ஊட்டி லிட்டில் ஸ்டார் அணி வெற்றி

கோத்தகிரி

நீலகிரி மாவட்ட கிரிக்கெட் சங்கத்தில் பதிவு செய்துள்ள ஏ, பி மற்றும் சி டிவிஷன் அணிகளுக்கு இடையே மாவட்ட அளவிலான லீக் போட்டிகள் ஊட்டி, கோத்தகிரியில் நடைபெற்று வருகிறது. இந்தநிலையில் கோத்தகிரி காந்தி மைதானத்தில் நேற்று நடைபெற்ற சி டிவிஷன் லீக் போட்டியில் ஊட்டி லிட்டில் ஸ்டார் அணியும், அருவங்காடு வெடிமருந்து தொழிற்சாலை அணியும் மோதியது. தலா 35 ஓவர்கள் கொண்ட போட்டியில் டாஸ் வென்று முதலில் பேட்டிங் செய்த ஊட்டி லிட்டில் ஸ்டார் அணி 29.1 ஓவரில் அனைத்து விக்கெட்டுகளையும் இழந்து 127 ரன்கள் எடுத்தது. இந்த அணி வீரர் ஜான்சன் 52 ரன்கள் எடுத்தார். அருவங்காடு வெடிமருந்து தொழிற்சாலை அணியின் பந்து வீச்சாளர்கள் சரவணகுமார், மதியழகன் ஆகியோர் தலா 3 விக்கெட்டுகளை வீழ்த்தினர். தொடர்ந்து விளையாடிய அருவங்காடு வெடிமருந்து தொழிற்சாலை அணி 19.4 ஓவர்களில் அனைத்து விக்கெட்டுகளையும் இழந்து 93 ரன்கள் மட்டுமே எடுத்து தோல்வியடைந்தது. இந்த அணி வீரர் ஜெயகுமார் அதிகபட்சமாக 31 ரன்கள் எடுத்தார். ஊட்டி லிட்டில் ஸ்டார் அணியின் பந்து வீச்சாளர்கள் ரோஷித், ஜான்சன் ஆகியோர் தலா 3 விக்கெட்டுகளை வீழ்த்தினர். இதன் மூலம் ஊட்டி லிட்டில் ஸ்டார் அணி 34 ரன்கள் வித்தியாசத்தில் வெற்றி பெற்றது.