தாரமங்கலம் அருகே மோட்டார் சைக்கிள் மோதி மூதாட்டி பலி

தாரமங்கலம் 

தாரமங்கலம் அருகே உள்ள அழகுசமுத்திரம் பகுதியை சேர்ந்தவர் சேகர். இவருடைய மனைவி ராஜாமணி அம்மாள் (வயது 55), கயிறு திரிக்கும் தொழிலாளி. இவர் நேற்று முன்தினம் இரவு கடைக்கு சென்று விட்டு வீட்டுக்கு நடந்து வந்தார். அப்போது சேலத்தில் இருந்து தாரமங்கலம் நோக்கி பெரியசோரகை சீரங்கனுர் பகுதியை சேர்ந்த தனசேகரன் என்பவர் மோட்டார் சைக்கிளில் வந்தார். அதிவேகமாக வந்த அவரது மோட்டார் சைக்கிள் எதிர்பாராதவிதமாக ராஜாமணி அம்மாள் மீது மோதியது. இதில் தூக்கி வீசப்பட்டு படுகாயம் அடைந்த மூதாட்டி ராஜாமணி அம்மாளை அக்கம்பக்கத்தினர் மீட்டு சேலம் அரசு ஆஸ்பத்திரியில் சிகிச்சைக்காக சேர்த்தனர். அங்கு அவர் சிகிச்சை பலனின்றி இறந்தார். இந்த விபத்து குறித்து தாரமங்கலம் போலீசார் வழக்குப்பதிவு செய்து விசாரணை நடத்தி வருகிறார்கள்.