தாளவாடியை அடுத்த தொட்டபுரம் கிராமத்தில் ஆஞ்சநேயர் கோவில் அருகே சண்முகம் (50) என்பவரின் விவசாயத் தோட்டம் உள்ளது. இவர் விவசாய தோட்டத்தை சுற்றி சோலார் பேட்டரியால் மின்வேலி அமைத்துள்ளார். இந்த நிலையில் நேற்று முன்தினம் காலை அவர் தோட்டத்துக்கு சென்று பார்த்தார்.
அப்போது மின்வேலியில் சிக்கி பெண் ஒருவர் இறந்து கிடந்தார். உடனே இதுபற்றி விவசாயி ஆசனூர் போலீசாருக்கு தகவல் கொடுத்தார். அதைத்தொடர்ந்து போலீசார் சம்பவ இடத்துக்கு விரைந்து சென்று பெண்ணின் உடலை கைப்பற்றி பிரேத பரிசோதனைக்காக சத்தியமங்கலம் அரசு ஆஸ்பத்திரிக்கு அனுப்பி வைத்தனர்.
இறந்த பெண்ணுக்கு சுமார் 65 வயது இருக்கும். யார் அவர்? எந்த ஊரை சேர்ந்தவர்? அவர் எதற்காக இங்கு வந்தார்? என்ற விவரங்கள் தெரியவில்லை.
இதுகுறித்து போலீசார் வழக்குப்பதிவு செய்து விசாரணை நடத்தி வருகிறார்கள்.