லாரி மீது மொபட் மோதல்; கணவன்- மனைவி பலி

விழுப்புரம்:

திருவெண்ணெய்நல்லூரை அடுத்த பையூர்மேடு மாரியம்மன் கோவில் தெருவை சேர்ந்தவர் ராதாகிருஷ்ணன் (வயது 62), இவருடைய மனைவி அம்சவள்ளி (54). இவர்கள் இருவரும் நேற்று  விழுப்புரம் அருகே பக்கிரிப்பாளையம் பகுதியில் உள்ள ஒரு செங்கல் சூளையில் கூலி வேலையை முடித்துவிட்டு மொபட்டில் வீடு திரும்பினர். விழுப்புரம்- செஞ்சி புறவழிச்சாலையில் முத்தாம்பாளையம் ஏரி அருகே மேம்பாலம் ஏறும் இடத்தில் நள்ளிரவு 1.30 மணியளவில் வந்து கொண்டிருந்தனர். அப்போது அங்கு சாலையோரமாக நின்று கொண்டிருந்த கன்டெய்னர் லாரியின் பின்னால் எதிர்பாராதவிதமாக அவர்களது மொபட் மோதியது.

கணவன்- மனைவி பலி

இந்த விபத்தில் ராதாகிருஷ்ணன், அம்சவள்ளி ஆகியோர் பலத்த காயமடைந்து சம்பவ இடத்திலேயே ரத்த வெள்ளத்தில் பரிதாபமாக இறந்தனர். விபத்து குறித்த தகவல் அறிந்ததும் சம்பவ இடத்திற்கு விழுப்புரம் தாலுகா போலீசார் விரைந்து சென்று இருவரின் உடலையும் பிரேத பரிசோதனைக்காக முண்டியம்பாக்கம் அரசு மருத்துவமனைக்கு அனுப்பி வைத்தனர். மேலும் இந்த விபத்து தொடர்பாக கன்டெய்னர் லாரி டிரைவரான தேனி மாவட்டம் தேவனாம்பட்டி கிராமத்தை சேர்ந்த பாலமுருகன் (40) என்பவர் மீது போலீசார் வழக்குப்பதிவு செய்து விசாரணை நடத்தி வருகின்றனர்.