தென்னைநார் தொழில் நிறுவன கோரிக்கைகளை பரிசீலிக்க உயர்மட்ட நிபுணர் குழு அமைக்கப்படும்: முதல்-அமைச்சர் அறிவிப்பு

சென்னை,

காயர் பித் மற்றும் பிற தென்னை நார் சம்பந்தப்பட்ட தொழில்களை வெள்ளை வகையில் இருந்து ஆரஞ்சு வகையாக மறுவகைப்படுத்தியது தொடர்பாக பல்வேறு தென்னை நார் தொழில் சார்ந்த சங்கங்களின் கோரிக்கைகள் அரசுக்கு பெறப்பட்டுள்ளன.

தமிழ்நாட்டில் உள்ள தென்னை சார் தொழில் நிறுவனங்களின் வளர்ச்சியிலும், நீடித்த நிலைத்தன்மையை உறுதி செய்வதிலும் மிகுந்த ஆர்வம்கொண்டுள்ள தமிழக அரசு, தமிழ்நாடு கயிறு வணிக மேம்பாட்டு நிறுவனம் என்ற நிறுவனத்தை தொடங்கி மதிப்பு கூட்டப்பட்டுள்ள பொருட்கள் உற்பத்தியை அதிகரிக்கவும், உள்ளூர் மற்றும் ஏற்றுமதி சந்தை வாய்ப்பை அதிகரிக்கவும் பல்வேறு முன்னெடுப்புகளை மேற்கொண்டுள்ளது. இதன் மூலம் நம் மாநிலத்தில் உள்ள தென்னை விவசாயிகளின் பொருளாதாரம் மேம்படும்.

உயர்மட்ட நிபுணர் குழு

தமிழ்நாட்டில் 4 ஆயிரத்துக்கும் மேற்பட்ட தென்னை நார் மற்றும் காயர் பித் உள்ளிட்ட தென்னைசார் தொழில் நிறுவனங்கள் இயங்கி வருகின்றன. பெருமளவில் பெண்களுக்கு வேலைவாய்ப்பை வழங்குவதுடன், மொத்தத்தில் 2 லட்சத்துக்கும் மேற்பட்ட கிராமப்புற வேலைவாய்ப்புகளை வழங்கிவரும் இந்நிறுவனங்களின் கோரிக்கையை தமிழ்நாடு அரசு மிகுந்த கனிவுடன் பரிசீலித்து வருகிறது.

இந்நிலையில் இந்த கோரிக்கை குறித்து அனைத்து தரப்பினருடனும் கலந்தாலோசித்து, இப்பொருள் குறித்து விரிவாக ஆராய்ந்து, அரசுக்கு பரிந்துரைக்க உயர்மட்ட நிபுணர் குழுவை அமைக்க தமிழ்நாடு அரசு முடிவு செய்துள்ளது. இம்முயற்சி சுற்றுச்சூழலுக்கு உகந்த வகையிலும், அதேசமயம் இந்நிறுவனங்கள் நிலைத்தன்மையுடன் இயங்கிடவும் வழிவகுக்கும்.

இவ்வாறு அதில் கூறப்பட்டுள்ளது.