மோட்டார் சைக்கிள் மீது அரசு பஸ் மோதி 2 பேர் பலி

தேன்கனிக்கோட்டை

தளி அருகே மோட்டார் சைக்கிள் மீது அரசு பஸ் மோதிய விபத்தில் 2 பேர் பலியானார்கள்.

பஸ் மோதியது

கர்நாடக மாநிலம் ஹாசன் மாவட்டம் கோணனூர் கிராமத்தை சேர்ந்தவர் பரமேஸ்வரன். இவருடைய மகன் ராஜேஷ் (வயது 37). கர்நாடக மாநிலம் சிக்பல்லாபூர் மாவட்டம் மாதேவபுரா அருகே பேகேப்பள்ளி கிராமத்தை சேர்ந்தவர் ஆதிநாராயணன். இவருடைய மகன் விஜய் (20). இவர்கள் 2 பேரும் நேற்று மாலை மோட்டார் சைக்கிளில் ஓசூரில் இருந்து தளி செல்லும் சாலையில் சென்று கொண்டு இருந்தனர்.

தளி மதகொண்டப்பள்ளி அரசு பள்ளி அருகே சென்ற போது அந்த வழியாக வந்த அரசு டவுன் பஸ் மோட்டார் சைக்கிள் மீது மோதியது. இந்த விபத்தில் தூக்கி வீசப்பட்ட ராஜேஷ் சம்பவ இடத்திலேயே ரத்த வெள்ளத்தில் பலியானார். மேலும் விஜய் படுகாயம் அடைந்தார்.

போலீசார் விசாரணை

இதையடுத்து அக்கம்பக்கத்தினர் அவரை மீட்டு ஆம்புலன்ஸ் மூலம் ஓசூர் அரசு மருத்துவமனைக்கு அனுப்பி வைத்தனர். ஆனால் மருத்துவமனைக்கு செல்லும் வழியிலேயே விஜய் பரிதாபமாக உயிரிழந்தார். இந்த விபத்து குறித்து தளி போலீசுக்கு தகவல் தெரிவிக்கப்பட்டது.

அதன் பேரில் போலீசார் விரைந்து சென்று இறந்த 2 பேரின் உடல்களையும் கைப்பற்றி பிரேத பரிசோதனைக்காக ஓசூர் அரசு மருத்துவமனைக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.