நாமக்கல்:
பிளஸ்-2 தேர்வு முடிந்ததை நாமக்கல்லில் மாணவ-மாணவிகள் உற்சாகமாக கொண்டாடினர்.
பிளஸ்-2 தேர்வு முடிந்தது
தமிழகம் முழுவதும் பிளஸ்-2 பொதுத்தேர்வு கடந்த மாதம் 13-ந் தேதி தொடங்கியது. நாமக்கல் மாவட்டத்தை பொறுத்தவரை இந்த ஆண்டு அரசு மற்றும் தனியார் பள்ளிகள் என மொத்தம் 200 பள்ளிகளை சேர்ந்த 19 ஆயிரத்து 7 மாணவ, மாணவிகள் தேர்வு எழுதினர்.
நேற்று கடைசி தேர்வாக வேதியியல் தேர்வு நடந்தது. மதியம் 1.15 மணிக்கு தேர்வு முடிவு வெளியே வந்த மாணவ, மாணவிகள் உற்சாகம் அடைந்தனர். மேலும் தங்களது உற்சாகத்தை வெளிப்படுத்தும் வகையில் ஒருவரை ஒருவர் கட்டித்தழுவினர்.
செல்பி
மாணவர்கள் ஒருவர் மீது ஒருவர் சட்டையில் பேனா மை தெளித்து விளையாடினர். மேலும் பட்டாசு வெடித்து கொண்டாடினர். அதேபோல் மாணவிகள் தங்களது தோழிகளுடன் செல்பி எடுத்து மகிழ்ந்தனர்.
தொடர்ந்து தேர்வு முடிந்து, விடுமுறை தொடங்கியதை அடுத்து மாணவிகள் உற்சாகமாக துள்ளி குதித்து, தாள்களை கிழித்து எறிந்தனர். சில மாணவிகள் பள்ளி பருவம் முடிந்ததால், தோழிகளை பிரிவதை எண்ணி கண்ணீர் சிந்தியதையும் பார்க்க முடிந்தது.