கண்களில் கருப்பு துணி கட்டி ஆர்ப்பாட்டம்

தாமரைக்குளம்:

அரியலூர் அண்ணா சிலை அருகே தமிழ்நாடு சத்துணவு மற்றும் அங்கன்வாடி சங்கங்களின் கூட்டமைப்பு சார்பில் ஆர்ப்பாட்டம் நடைபெற்றது. ஆர்ப்பாட்டத்திற்கு சத்துணவு மற்றும் அங்கன்வாடி ஓய்வூதியர் சங்க மாவட்ட தலைவர் பழனிவேல் தலைமை தாங்கினார். மாவட்ட செயலாளர் தமிழரசன் ஆர்ப்பாட்டம் குறித்து விளக்கி பேசினார். ஆர்ப்பாட்டத்தில் சத்துணவு-அங்கன்வாடி ஓய்வுபெற்ற ஊழியர்கள் கண்களில் கருப்பு துணி கட்டிக்கொண்டனர். சத்துணவு-அங்கன்வாடி திட்டங்களில் பணியாற்றி ஓய்வு பெற்றவர்களுக்கு ரூ.6,750 மாதாந்திர சிறப்பு ஓய்வூதியம் வழங்க வேண்டும். சத்துணவு-அங்கன்வாடி திட்டங்களில் பணிபுரிபவர்களுக்கு முறையான கால முறை ஊதியம் வழங்குவதற்கு ஏதுவாக அனைத்து அரசு துறைகளிலும் உள்ள நிரந்தர காலமுறை ஊதியத்திலான காலி பணியிடங்களில் 50 சதவீத பணியிடங்களை ஒதுக்கி, அதில் தகுதி உள்ள சத்துணவு-அங்கன்வாடி ஊழியர்களை மூப்பு அடிப்படையில் பதவி உயர்வு வழங்கி ஈர்த்திட வேண்டும். காலை சிற்றுண்டி திட்டத்தை தனியாரிடம் ஒப்படைப்பதை கைவிட்டு, சத்துணவு திட்டத்தில் சேர்க்க வேண்டும் என்பன உள்ளிட்ட கோரிக்கைகளை வலியுறுத்தி இந்த ஆர்ப்பாட்டம் நடந்தது. முடிவில் மாவட்ட பொருளாளர் கோவிந்தசாமி நன்றி கூறினார்.