மோட்டார் சைக்கிள் மீது லாரி மோதி டிரைவர் சாவு

பர்கூர்

பர்கூர் அருகே உறவினர் வீட்டு திருமணத்திற்கு சென்றபோது மோட்டார் சைக்கிள் மீது லாரி மோதி கார் டிரைவர் பரிதாபமாக இறந்தார். அவரது மனைவி படுகாயம் அடைந்தார்.

லாரி மோதியது

பர்கூர் அருகே உள்ள கொல்லப்பள்ளி பகுதியைச் சேர்ந்தவர் மார்கண்டன் (வயது 50). கார் டிரைவர். இவருடைய மனைவி விண்ணரசி (42). கணவன்-மனைவி 2 பேரும் நேற்று காலை மல்லப்பாடியில் உறவினர் வீட்டு திருமணத்திற்காக மோட்டார் சைக்கிளில் சென்றனர். இவர்கள் வாணியம்பாடி பைபாஸ் ரோட்டில் சென்று கொண்டு இருந்தனர்.

அப்போது எதிரே கிருஷ்ணகிரி நோக்கி வந்த லாரி, மோட்டார் சைக்கிள் மீது மோதியது. இந்த விபத்தில் மார்கண்டன் சம்பவ இடத்திலேயே பரிதாபமாக இறந்தார். விண்ணரசி படுகாயம் அடைந்தார். அக்கம் பக்கத்தினர் அவரை மீட்டு கிருஷ்ணகிரி அரசு மருத்துவமனைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

விசாரணை

இந்த விபத்து குறித்து தகவல் அறிந்ததும் பர்கூர் போலீசார் விரைந்து சென்று மார்க்கண்டன் உடலை கைப்பற்றி பிரேத பரிசோதனைக்காக கிருஷ்ணகிரி அரசு மருத்துவமனைக்கு அனுப்பி வைத்தனர். தொடர்ந்து விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர். உறவினர் வீட்டு திருமணத்திற்கு சென்றபோது விபத்தில் மனைவி கண் எதிரே கார் டிரைவர் பலியான சம்பவம் அந்த பகுதியில் சோகத்தை ஏற்படுத்தியது.