ஓசூர்
ஓசூரில் வெவ்வேறு இடங்களில் நடந்த விபத்துகளில் டீக்கடைக்காரர் உள்பட 2 பேர் இறந்தனர்.
டீக்கடைக்காரர்
ஓசூர் அருகே உளியாளம் கிராமத்தை சேர்ந்தவர் ஹென்றி கிருபாகரன் (வயது55). இவர், அந்த பகுதியில் ஆவின் டீக்கடை நடத்தி வந்தார். சம்பவத்தன்று இவர் மோட்டார் சைக்கிளில் வட்டார வளர்ச்சி அலுவலகம் அருகே சென்று கொண்டு இருந்தார்.
அப்போது, அந்த வழியாக வந்த லாரி, மோட்டார் சைக்கிள் மீது மோதியது. இதில், ஹென்றி கிருபாகரன் பலத்த காயமடைந்து சம்பவ இடத்திலேயே உயிரிழந்தார். இதுகுறித்து ஓசூர் அட்கோ போலீசார் வழக்குப்பதிவு செய்து விசாரணை நடத்தி வருகின்றனர்.
முதியவர் சாவு
தர்மபுரி மாவட்டம் அரூரை சேர்ந்தவர் முருகன் (70). இவர், ஓசூரில் துணி வியாபாரம் செய்து வந்தார். சம்பவத்தன்று இரவு அவர், ஓசூர் தர்கா அருகேயுள்ள முத்துமாரியம்மன் கோவில் அருகே நடந்து சென்றார். அப்போது அந்த வழியாக சென்ற மினி லாரி முருகன் மீது மோதியது.
இந்த விபத்தில் படுகாயமடைந்த அவர், சம்பவ இடத்திலேயே உயிரிழந்தார். இதுகுறித்து ஓசூர் சிப்காட் போலீசார் வழக்குப்பதிவு செய்து விசாரித்து வருகின்றனர்.