ஒரே நாளில் 8 பேருக்கு கொரோனா

ஈரோடு:

தமிழகத்தில் கொரோனா தொற்று பரவல் கடந்த சில நாட்களாக தினமும் அதிகரித்து கொண்டே செல்கிறது. தினசரி தொற்று பாதிப்பு ஆயிரத்தை கடந்து விட்டது. ஈரோடு மாவட்டத்திலும் தொற்று பரவல் அதிகரித்த வண்ணம் உள்ளது. நேற்று முன்தினம் 215 பேருக்கு பரிசோதனை செய்யப்பட்டதில், 4 பேருக்கு தொற்று கண்டறியப்பட்டது.

இந்தநிலையில் நேற்று ஒரே நாளில் 8 பேருக்கு கொரோனா தொற்று உறுதியானது. இதனால் தொற்று பாதித்தவர்களின் எண்ணிக்கை 1 லட்சத்து 32 ஆயிரத்து 735 ஆக உயர்ந்தது. இதில் 1 லட்சத்து 31 ஆயிரத்து 965 பேர் குணமடைந்தார்கள். நேற்று மட்டும் 3 பேர் கொரோனாவில் இருந்து மீண்டனர். தினசரி பாதிப்பு அதிகரித்து வருவதால், சிகிச்சை பெறுபவர்களின் எண்ணிக்கையும் உயர்ந்து வருகிறது. தற்போது 36 பேர் சிகிச்சை பெற்று வருகிறார்கள். இதுவரை கொரோனாவுக்கு 734 பேர் பலியாகி உள்ளனர்.