தேசிய அளவிலான தடகள போட்டியில் தங்கப்பதக்கம் வென்றவருக்கு பாராட்டு

ஜோலார்பேட்டை

திருப்பத்தூர் மாவட்டம் ஜோலார்பேட்டை பகுதியை சேர்ந்த தென்னரசு சாம்ராஜ் என்பவரின் மகன் விஷால் என்பவர் கடந்த 3-ந் தேதி குஜராத் மாநிலத்தில் நடைபெற்ற தேசிய அளவிலான தடகள போட்டியில் 200 மீட்டர் ஓட்டப்பந்தயத்தில் முதலிடம் பிடித்து தங்கம் வென்று தமிழகத்திற்கு பெருமை சேர்த்தார்.

இதையடுத்து திருப்பத்தூர் மாவட்டத்திற்கு வருகை தந்த விஷாலை பலரும் வாழ்த்து தெரிவித்து பாராட்டி வருகின்றனர். இந்த நிலையில் ஜோலார்பேட்டையில் தேசிய, மாநில அளவிலான பல்வேறு விளையாட்டு வீரர்களை உருவாக்கியுள்ள பி.கே. ஸ்போர்ட்ஸ் சார்பில் கோடைகால இலவச பயிற்சி முகாம் நிறைவு விழா நடைபெற்றது.

விழாவில் தங்கம் வென்ற விஷாலுக்கு பாராட்டு விழா நடத்தி கவுரவித்தனர். ஜோலார்பேட்டை போலீஸ் இன்ஸ்பெக்டர் மங்கையர்கரசி சிறப்பு அழைப்பாளராக கலந்துகொண்டு பயிற்சி மாணவர்களுக்கு ஊக்கமளித்து சிறப்புரையாற்றி கவுரவித்தார்.

நிகழ்ச்சியில் சப்-இன்ஸ்பெக்டர் நடராஜன், உடற்கல்வி ஆசிரியர் மதன்குமார், ஸ்போர்ட்ஸ் நிறுவனத்தின் பயிற்சியாளர்கள், நிர்வாகிகள் மற்றும் பயிற்சி மாணவர்கள் பொதுமக்கள் என பலர் கலந்து கொண்டனர்.