புகார் பெட்டி

சாலை சீரமைக்கப்படுமா?

சிவகங்கை மாவட்டம் காரைக்குடி நகர் பகுதி சாலையானது சில இடங்களில் சேதமடைந்து காணப்படுகிறது. மேலும் சேதமடைந்த சாலைகளில் மழைநீர் தேங்குவதால் வாகன ஓட்டிகள் தங்களது வாகனங்களை இயக்க மிகவும் சிரமப்படுகின்றனர். எனவே இந்த சாலைகளை சீரமைக்க அதிகாரிகள் நடவடிக்கை எடுக்க வேண்டும்.

மணிமாறன், காரைக்குடி.

பொதுமக்கள் அச்சம்

சிவகங்கை மாவட்டம் இளையான்குடி மற்றும் அதன் சுற்றுவட்டார பகுதிகளில் தெருநாய்கள் அதிகளவில் சுற்றித்திரிகின்றன. இந்த நாய்கள் பொதுமக்களை அச்சுறுத்தி வருவதுடன் சிலரை கடிக்கவும் செய்கிறது. இதனால் அப்பகுதி மக்கள் வீட்டை விட்டு வெளியே செல்ல அச்சப்படுகின்றனர். எனவே நாய்களை பிடித்து அப்புறப்படுத்த அதிகாரிகள் நடவடிக்கை எடுப்பார்களா?

ராஜன், இளையான்குடி.

போக்குவரத்து நெரிசல்

சிவகங்கை மாவட்டம் சிங்கம்புணரி நகர் பகுதியில் அதிக வாகன பெருக்கத்தால் அடிக்கடி போக்குவரத்து நெரிசல் ஏற்படுகிறது. இதனால் பள்ளி மாணவர்களும், வேலைக்கு செல்பவர்களும் மிகவும் பாதிக்கப்படுகின்றனர். எனவே போக்குவரத்து நெரிசலை தடுக்க நடவடிக்கை எடுக்க வேண்டும்.

பொதுமக்கள், சிங்கம்புணரி.

சேதமடைந்த சாலை

சிவகங்கை மாவட்டம் இளையான்குடி தாலுகா கலைக்குளம் ஊராட்சி 3-வது வார்டு பகுதியில் உள்ள சாலை மிகவும் சேதமடைந்து காணப்படுகிறது. மேலும் மழைக்காலங்களில் சாலைகளில் மழைநீருடன் கழிவுநீர் தேங்கி குளம் போல் காட்சியளிக்கிறது. இதனால் இப்பகுதி பொதுமக்கள் மிகவும் அவதிப்படுகின்றனர். இதுகுறித்து நடவடிக்கை எடுக்கப்படுமா?

பொதுமக்கள், இளையான்குடி.

வாகன ஓட்டிகள் அவதி

சிவகங்கை மாவட்டம் காரைக்குடி கழனிவாசல் ஓ.சிறுவயல் சாலையில் அமைந்துள்ள அரசு மதுப்பானக்கடையை ஒட்டி செல்லும் சாலை மண் சாலையாகவே உள்ளது. மழைக்காலங்களில் சேறும் சகதியுமாக காட்சியளிக்கிறது. இதனால் இவ்வழியாக செல்லும் வாகன ஓட்டிகள் அவதியடைந்து வருகின்றனர். இங்கு சாலை வசதி அமைக்க அதிகாரிகள் நடவடிக்கை எடுக்க வேண்டும்.

மணி, காரைக்குடி.