கள்ளக்குறிச்சி மாவட்டத்தில்போட்டித்தேர்வுகளுக்கு இலவச பயிற்சிபெற முன்பதிவு செய்து கொள்ளலாம் கலெக்டர் தகவல்

நான் முதல்வன் திட்டத்தின் கீழ் மாநிலம் முழுவதும் உள்ள பொறியியல் கல்லூரிகள், கலை மற்றும் அறிவியல் கல்லூரிகளில் உள்ள மாணவர்களுக்கு தொழில்துறை சார்ந்த வேலைவாய்ப்பு திறன்களை மேம்படுத்தும் வகையில் திறன்பயிற்சிகள் வழங்கப்பட்டு வருகிறது.

அந்த வகையில் கடந்த மார்ச் மாதம் நான் முதல்வன் திட்டத்தின் கீழ் போட்டித் தேர்வுகளுக்கான பயிற்சி வகுப்பை தனிப்பிரிவு இளைஞர் நலன் மற்றும் விளையாட்டு மேம்பாட்டுத்துறை அமைச்சர் உதயநிதி ஸ்டாலின் தொடங்கி வைத்தார். இத்திட்டத்தின் மூலம் பணியாளர் தேர்வாணையம், ரெயில்வே பணியாளர் தேர்வாணையம் மற்றும் வங்கி பணியாளர் தேர்வாணையம் ஆகிய தேர்வுகளுக்கு விண்ணப்பிக்கும் போட்டித்தேர்வர்களில் வெற்றி பெற கட்டணமில்லா ஒருங்கிணைந்த பயிற்சி வழங்க திட்டமிடப்பட்டுள்ளது.

மேலும் எஸ்.எஸ்.சி. மூலம் நடத்தப்படும் ஒருங்கிணைந்த பட்டப்படிப்பு தர நிலை தேர்வு(ஏதேனும் ஒரு பட்டப்படிப்பு), ஒருங்கிணைந்த மேல்நிலை தரநிலை தேர்வு(12-ம் வகுப்பு தகுதி), பல்வகை பணி தேர்வு(10-ம் வகுப்பு தகுதி தேர்வு) போன்ற தேர்வுகளுக்கான பாடத்திட்டம் ஆப்டிட்யூட், ரீசனிங், பொது ஆங்கிலம் மற்றும் பொது அறிவு ஆகும். மேலும் ஒருங்கிணைந்த மேல்நிலை தரநிலை மற்றும் பல்வகை பணிகளுக்கான தேர்வுகள் தமிழ், ஆங்கிலம் உள்பட 13 மொழிகளில் நடத்தப்படும்

கட்டணமில்லா பயிற்சி வகுப்புகள்

எஸ்.எஸ்.சி மூலம் அறிவிக்கப்படும் ஒருங்கிணைந்த பட்டப்படிப்பு தர நிலை தேர்வு, ஒருங்கிணைந்த மேல்நிலை தரநிலை தேர்வு, வங்கி பணியாளர் தேர்வாணையம், ரெயில்வே பணியாளர் தேர்வாணையம் போன்ற போட்டித்தேர்வுகளுக்கு ஒருங்கிணைந்த கட்டணமில்லா பயிற்சி வகுப்புகள் உத்தேசமாக 100 நாட்களில் 300 மணி நேரமும், 100 மாதிரி தேர்வுகளும் நடத்தப்பட உள்ளது.

இப்பயிற்சி வகுப்பில் 150 மாணவ, மாணவிகள் கலந்து கொள்ளலாம். இதில், கலந்து கொள்ளும் அனைத்து மாணவ, மாணவிகளுக்கும் தினசரி நடத்தப்படும் வகுப்பிற்கான அச்சிடப்பட்ட பாடக்குறிப்புகளும் இலவசமாக வழங்கப்படும். இப்பயிற்சி வகுப்பு காலை 10 மணி முதல் மாலை 5 மணி வரை கள்ளக்குறிச்சி அருகே இந்திலியில் அமைந்துள்ள டாக்டர் ஆர்.கே.எஸ் கலை மற்றும் அறிவியல் கல்லூரியில் நடைபெற உள்ளது. தமிழ்நாடு திறன் மேம்பாட்டு கழகத்தின் வாயிலாக மத்திய அரசுப் பணிகளுக்குரிய போட்டித்தேர்வுகளுக்கு பயிற்சி அளிக்கும் பிரத்யேக திறன் கொண்ட பயிற்றுநர்களை கொண்டு பயிற்சி வகுப்புகள் நடத்தபட உள்ளது.

முன்பதிவு

இப்பயிற்சி வகுப்பில் கலந்து கொள்ள தகுதியும், ஆர்வமும் உள்ள பட்டப்படிப்பு படித்து முடித்த போட்டித்தேர்வர்கள் மற்றும் கல்லூரியில் இறுதியாண்டு படிக்கும் மாணவ, மாணவிகளும் நான் முதல்வன் திட்ட இணையதளத்தில் உள்ள https://candidate.tnskill.tn.gov.in/CE- NM/TNSDC-REGISTRATION.ASPX என்ற இணைப்பை பயன்படுத்தி முன்பதிவு செய்து கொள்ளலாம்.

மேற்கண்ட தகவல் கள்ளக்குறிச்சி மாவட்ட கலெக்டர் ஷ்ரவன் குமார் வெளியிட்டுள்ள செய்திக்குறிப்பில் கூறப்பட்டுள்ளது.