ஓட்டல் ஊழியரிடம் பணம், செல்போன் பறிப்பு

தஞ்சை மாவடடம் திருவோணத்தை அடுத்துள்ள ராஜாளி விடுதி கிராமத்தை சேர்ந்த சுந்தர்ராஜ் என்பவரின் மகன் ரெங்கராஜ் (வயது 34). இவர் பட்டுக்கோட்டையில் உள்ள ஒரு ஓட்டலில் ஊழியராக வேலை பார்த்து வருகிறார். இவர் நேற்று முன்தினம் அதிகாலை 4 மணி அளவில் தீபாவளி தினத்தன்று மோட்டார் சைக்கிளில் வீட்டிற்கு சென்று கொண்டிருந்தார். பட்டுக்கோட்டை- கந்தர்வகோட்டை பிரதான சாலையில் வேப்பங்காடு பாலம் அருகே அவர் சென்ற போது அங்கு மோட்டார் சைக்கிளுடன் சாலையில் நின்று கொண்டிருந்த 3 பேர், ரெங்கராஜை வழிமறித்து முகவரி கேட்பது போல் பேச்சு கொடுத்தனர். பின்னர் அவர்கள் 3 பேரும் ரெங்கராஜ் பையில் வைத்திருந்த ரூ.18 ஆயிரம் மற்றும் செல்போன் ஆகியவற்றை பறித்துக்கொண்டு மோட்டார் சைக்கிளில் ஏறி வேகமாக சென்று விட்டனர். இதுகுறித்து ரெங்கராஜ் கொடுத்த புகாரின்பேரில் திருவோணம் போலீசார் வழக்குப்பதிவு செய்து அவரிடம் இருந்து பணம், செல்போனை பறித்துச் சென்ற 3 பேர் கும்பலை வலைவீசி தேடி வருகின்றனர்.