முதுமலை, நடுவட்டம் பகுதியில்இறந்து கிடந்த 3 புலிகள்;வனத்துறையினர் விசாரணை

முதுமலை. நடுவட்டம் பகுதியில் 3 புலிகள் மர்மமான முறையில் இறந்து கிடந்தன. இதுகுறித்து வனத்துறையினர் விசாரணை நடத்தி வருகிறார்கள்.

2 புலி குட்டிகள் சாவு

நீலகிரி மாவட்டம் கூடலூர் அருகே முதுமலை புலிகள் காப்பகம் உள்ளது. 688 சதுர கி.மீ. பரப்பளவு கொண்ட முதுமலை வனப்பகுதியில் காட்டு யானைகள், புலிகள், கரடிகள், மான்கள், சிறுத்தைகள் உள்ளிட்ட வனவிலங்குகள் வசிக்கின்றன. இதுதவிர தெப்பக்காடு முகாமில் வளர்ப்பு யானைகள் பராமரிக்கப்பட்டு வருகின்றன. இதனால் முதுமலையை சுற்றி பார்க்க சுற்றுலா பயணிகள் வந்த வண்ணம் உள்ளனர்.

இதற்காக வனத்துறை சார்பில் வாகன சவாரியும் உள்ளது. இந்தநிலையில் முதுமலை புலிகள் காப்பகத்திற்கு உட்பட்ட சீகூர் வன சரகத்தில் உள்ள சிறியூர் வனப்பகுதியில் வனத்துறை ஊழியர்கள் நேற்று முன்தினம் மாலை ரோந்து சென்றனர். அப்போது அங்கு 2 புலி குட்டிகள் இறந்து கிடந்தன. 2 புலி குட்டிகளும் பிறந்து 2 வாரமே ஆனது தெரியவந்தது. இதில் ஒரு புலி குட்டியின் உடல் மிகவும் அழுகிய நிலையில் காணப்பட்டது. இதுகுறித்து உடனே வனத்துறை ஊழியர்கள், புலிகள் காப்பக உயர் அதிகாரிகளுக்கு தகவல் தெரிவித்தனர்.

பிரேத பரிசோதனை

அதன்பேரில் முதுமலை புலிகள் காப்பக துணை கள இயக்குனர் அருண், வனச்சரகர் தயாநந்தன் மற்றும் வனத்துறையினர், கால்நடை மருத்துவர்கள் சம்பவ இடத்திற்கு விரைந்து சென்று இறந்த புலி குட்டிகளின் உடல்களை பார்வையிட்டனர். பின்னர் புலி குட்டிகளின் உடல்கள் கைப்பற்றப்பட்டு பிரேத பரிசோதனை செய்யப்பட்டது. இதில் புலி குட்டிகளின் உடல் உறுப்புகள் ஆரோக்கியமாக இருந்தது தெரியவந்தது. ஆனால், புலி குட்டிகள் எப்படி இறந்தது என்பது தெரியவில்லை. மேலும் தாய் புலி உயிருடன் உள்ளதா? அல்லது தாய் புலி இறந்ததால் குட்டிகளும் இறந்ததா? என்ற சந்தேகம் எழுந்து உள்ளது. இதையடுத்து தாய் புலியை வனத்துறையினர் தேடி வருகின்றனர். மேலும் பிரேத பரிசோதனை அறிக்கை வந்த பின்னர் தான் புலி குட்டிகள் இறந்ததற்கான முழு விவரம் தெரியவரும் என வனத்துறையினர் தெரிவித்தனர்.

இன்னொரு புலி

இதேபோல் நேற்று ஊட்டி அருகே நடுவட்டம் பகுதியில் உள்ள தனியார் தேயிலை தோட்டத்தில் ஒரு புலி இறந்து கிடப்பதாக வனத்துறை அதிகாரிகளுக்கு தகவல் கிடைத்தது. அதன்பேரில் வனத்துறை அதிகாரிகள், முதுமலை புலிகள் காப்பக கால்நடை மருத்துவர்கள் ராஜேஷ்குமார், ரேவதி மற்றும் பவித்தரா ஆகியோர் சென்று இறந்து கிடந்த புலியை பார்வையிட்டனர். பின்னர் இறந்து கிடந்த புலிக்கு பிரேத பரிசோதனை செய்தனர். இதில் இறந்து கிடந்தது 7 வயது மதிக்கத்தக்க பெண் புலி என்பது தெரியவந்தது. ஆனால் அந்த புலி எப்படி இறந்தது என்பது தெரியவில்லை. மற்ற வனவிலங்குகளுடன் சண்டையிட்டதில் புலி இறந்திருக்கலாம் என்று சந்தேகிக்கப்படுகிறது. ஆனாலும் பிரேத பரிசோதனை அறிக்கை வந்த பிறகு தான் புலி செத்ததற்கான காரணம் தெரியவரும் என்று வனத்துறையினர் தெரிவித்தனர்.

உலகளவில் புலிகள் எண்ணிக்கை குறைந்து வரும் நிலையில் முதுமலை, நடுவட்டம் பகுதியில் 3 புலிகள் இறந்து கிடந்த சம்பவம் வனவிலங்கு, சுற்றுச்சூழல் ஆர்வலர்கள் இடையே பெரும் அதிர்ச்சியையும், பரபரப்பையும் ஏற்படுத்தி உள்ளது.