ஆங்கிலத்தில் விழிப்புணர்வு வாசகங்கள் அடங்கிய போர்டுகள்

திருக்காட்டுப்பள்ளி பகுதியில் உள்ள மாநில சாலையில் ஆங்கிலத்தில் விழிப்புணர்வு வாசகங்கள் அடங்கிய போர்டுகள் வைக்கப்பட்டுள்ளன. தமிழில் போர்டுகள் வைக்க வேண்டும் என தமிழ் ஆர்வலர்கள் எதிர்பார்க்கின்றனர்.

சாலை அகலப்படுத்தும் பணி

திருக்காட்டுப்பள்ளி பகுதியில் மாநில சாலைகள் அகலப்படுத்தப்பட்டு வருகின்றன. இதில் கல்லணை திருவையாறு சாலை (மாநில சாலை எண்22) கல்லணையில் இருந்து திருக்காட்டுப்பள்ளி வரை அகலப்படுத்தும் பணிகள் நடைபெற்று வருகின்றன. முழுவதும் முடிவடைந்த சாலைகளில் வெள்ளைக்கோடுகள், சாலை ஓரங்களில் மிளிரும் எச்சரிக்கை பலகைகள், பிரதிபலிப்பான்கள் பொருத்தி உள்ளனர். அதே சமயம் சாலையின் இருபுறமும் ஆங்காங்கே நான்குசக்கர, இரண்டு சக்கர வாகன ஓட்டுனர்களுக்கு விழிப்புணர்வு வாசகங்கள் அடங்கிய போர்டுகள் நெடுஞ்சாலை துறை சார்பில் பச்சைநிறத்தில் வைக்கப்பட்டுள்ளது.

ஆங்கிலத்தில் போர்டுகள்

இதில் விழிப்புணர்வு மற்றும் எச்சரிக்கை வாசகங்கள் ஆங்கிலத்தில் மட்டுமே உள்ளன. தமிழ்நாட்டில் மாநில நெடுஞ்சாலையில் ஆங்கில வாசகங்கள் மட்டுமே உள்ள விழிப்புணர்வு போர்டுகளை கண்ட தமிழ் ஆர்வலர்கள் வேதனை படுகின்றனர். தமிழ்நாட்டில் பெரும்பாலும் தமிழ்தெரிந்த ஓட்டுனர்களுக்கு புரியும் மொழியில் விழிப்புணர்வு வாசகங்கள் எழுதலாம். பிற மாநில வாகன ஓட்டிகள் தெரிந்து கொள்வதற்காக ஆங்கில மொழியிலும், தமிழ்மக்கள் தெரிந்து கொள்வதற்காக தமிழிலும் வாசகங்கள் அடங்கிய போர்டுகள் வைக்கலாம்.

தமிழ் மொழியில் வைக்க வேண்டும்

தமிழை புறக்கணித்து ஆங்கில வாசகங்கள் அடங்கிய போர்டுகள் வைக்கப்பட்டு உள்ளது. தமிழ்நாட்டில் தமிழ் புறக்கணிக்கப்படுகிறதோ என்று தோன்றுவதாக தமிழ் ஆர்வலர்கள் வேதனை தெரிவிக்கின்றனர். எனவே மாநில சாலையில் உள்ள விழிப்புணர்வு வாசகங்கள் அடங்கிய போர்டுகளை தமிழ், ஆங்கிலம் ஆகிய 2 மொழிகளிலும் வைக்க வேண்டும் என்று தமிழ் ஆர்வலர்கள் எதிர்பார்க்கின்றனர்.