நம்ம ஊரு சூப்பரு விழிப்புணர்வு வாகனம்

எஸ்.புதூர்,

எஸ்.புதூர் ஊராட்சியில் நம்ம ஊரு சூப்பரு சிறப்பு விழிப்புணர்வு பிரசார வாகனத்தை அமைச்சர் பெரியகருப்பன் கொடியசைத்து தொடங்கி வைத்தார்.

விழிப்புணர்வு வாகனம்

பொது சுகாதாரம் மற்றும் நோய்த்தடுப்பு மருந்துத்துறை சார்பில் அ.மு.மு. அறக்கட்டளை மற்றும் வொக்கார்ட் அறக்கட்டளை இணைந்து பொதுமக்களுக்கு தேவையான மருத்துவ சேவையை அவர்கள் வசிக்கும் பகுதியிலேயே வழங்க எஸ்.புதூர் ஒன்றியத்தை சேர்ந்த 16 கிராமங்களில் உள்ள பொதுமக்கள் பயன்பெறும் வகையில் ரூ.35 லட்சம் மதிப்பிலான இலவச நடமாடும் மருத்துவ வாகனத்தை வழங்கினர்.

தொடர்ந்து ஊரக வளர்ச்சி மற்றும் ஊராட்சித்துறை சார்பில் நம்ம ஊரு சூப்பரு சிறப்பு விழிப்புணர்வு பிரசார வாகனம் மற்றும் இலவச நடமாடும் மருத்துவ வாகனத்தை ஊரக வளர்ச்சித்துறை அமைச்சர் பெரியகருப்பன் கொடியசைத்து பொதுமக்கள் பயன்பாட்டிற்காக தொடங்கி வைத்தார். எஸ்.புதூர் ஊராட்சியில் நடந்த இந்த விழாவுக்கு மாவட்ட கலெக்டர் மதுசூதன் ரெட்டி தலைமை தாங்கினார்.

நம்ம ஊரு சூப்பரு

பொதுமக்களின் ஆரோக்கியத்தை கருத்தில் கொண்டு சுகாதாரத்தை மேம்படுத்தும் பொருட்டும், சுத்தமான சுற்றுச்சூழலை அனைத்து பகுதிகளிலும் உருவாக்கிடும் நோக்கிலும் நம்ம ஊரு சூப்பரு ஊரக பகுதிகளில் சிறப்பு விழிப்புணர்வு பிரசார வாகனம் அக்டோபர் 2-ந் தேதி வரை மேற்கொள்ளப்பட உள்ளது.

தூய்மை பணியார்களுக்கு பாதுகாப்பு உபகரணங்கள், மீண்டும் மஞ்சபை திட்டத்தின் கீழ் பொதுமக்களுக்கு மஞ்சபை வழங்கி, சீலப்ப நாயக்கர் ஊருணியை சுற்றிய பகுதிகளில் நம்ம ஊரு சூப்பரு திட்டத்தின் கீழ் மரக்கன்றுகளை அமைச்சர் நட்டு வைத்தார்.

கலந்து கொண்டவர்கள்

இதில் மாவட்ட ஊராட்சி தலைவர் பொன்மணி பாஸ்கரன், சுகாதார பணிகள் துணை இயக்குனர் ராம்கணேஷ், அ.மு.மு. அறக்கட்டளை மேலாண்மை இயக்குனர் நாராயணன், வொக்கார்ட் அறக்கட்டளை மருத்துவ இயக்குனர் ஸ்ரீராம், உதவி இயக்குனர் ஊராட்சிகள் குமார், உதவி திட்ட இயக்குனர் விசாலாட்சி, சிங்கம்புணரி தாசில்தார் கயல்செல்வி, ஒன்றிய சேர்மன் விஜயா குமரன், துணை சேர்மன் வீரம்மாள் பழனிசாமி, வட்டார வளர்ச்சி அலுவலர் சந்திரா, ஊராட்சி தலைவர் ராதாகிருஷ்ணன், வட்டார மருத்துவ அலுவலர் ஸ்ரீகாந்த், தி.மு.க. ஒன்றிய செயலாளர் செல்வராஜ், ஒன்றிய கவுன்சிலர் சின்னம்மாள் மென்னன், மாவட்ட ஒருங்கிணைப்பாளர் ஆரோக்கிய பல்த்சர் உள்பட பலர் கலந்து கொண்டனர்.