விதிமீறல்கள் உள்ளதா? பள்ளிக்கூட மாணவர்கள் செல்லும் ஆட்டோக்களில் சோதனை

மதுரை மாவட்ட போக்குவரத்து இணை ஆணையர் சத்தியநாராயணன் உத்தரவின் பேரில் மதுரையில் பள்ளி மாணவர்களை அழைத்து வரும் அரசு பஸ்கள், ஆட்டோக்கள் மீதான சிறப்பு வாகன தணிக்கை நடந்தது. அதன்படி, மதுரை வடக்கு வட்டார போக்குவரத்து அலுவலர் சித்ரா ஆலோசனையின்பேரில் மோட்டார் வாகன ஆய்வாளர்கள் முரளி, உலகநாதன் உள்ளிட்டோர் தமுக்கம் பகுதியில் வந்த வாகனங்களில் சோதனை நடத்தினர். அப்போது, அரசு பஸ்களில் படிக்கட்டில் பயணம் செய்த மாணவர்களுக்கு அறிவுரை வழங்கினர். அதுபோல், பள்ளி மாணவர்களை அழைத்து வந்த ஆட்டோக்களின் உரிமையாளர்கள் கடைபிடிக்க வேண்டிய விதிமுறைகள் குறித்தும், அதிக எண்ணிக்கையில் நபர்களை அழைத்து செல்லக்கூடாது எனவும் எடுத்துரைத்தனர். வரும் நாட்களில் பள்ளி மாணவர்களை அழைத்து செல்லும் வாகனங்களில் விதிமீறல்கள் கண்டறியப்பட்டால் அபராதத்துடன் கடும் நடவடிக்கை எடுக்கப்படும் எனவும் அதிகாரிகள் கூறினர்.