மகப்பேறு விடுப்பு வழங்கக்கோரி அங்கன்வாடி ஊழியர்கள் காத்திருப்பு போராட்டம்

அங்கன்வாடி ஊழியர்கள் பல்வேறு கோரிக்கைகளை வலியுறுத்தி அரியலூர் பஸ் நிலையம் அருகே செல்போன் டார்ச் வெளிச்சத்தில் நேற்று காத்திருப்பு போராட்டத்தில் ஈடுபட்டனர். போராட்டத்திற்கு மாவட்ட தலைவர் ராஜாமணி தலைமை தாங்கினார். இதில், மாவட்ட செயலாளர் சகுந்தலா, மாவட்ட பொருளாளர் ஜோதிலட்சுமி ஆகியோர் கோரிக்கைகளை வலியுறுத்தி பேசினர். ஆர்ப்பாட்டம் குறித்து சங்க நிர்வாகிகள் கூறியதாவது:-

அங்கன்வாடியில் உள்ள காலி பணியிடங்களை முழுமையாக நிரப்பிட வேண்டும். அரசு ஊழியர்களுக்கு உள்ளது போலவே அங்கன்வாடி ஊழியர்களுக்கும் மகப்பேறு விடுப்பு வழங்க வேண்டும். பள்ளி, கல்லூரிகளுக்கு கோடை விடுமுறை விடுவது போல் அங்கன்வாடி பணியாளர்களுக்கும் விடுமுறை அளிக்க வேண்டும். 10 ஆண்டுகள் பணிசெய்த அங்கன்வாடி உதவியாளர்களுக்கு எந்தவித நிபந்தனையும் இன்றி உடனடியாக பதவி உயர்வு வழங்க வேண்டும். இவ்வாறு அவர்கள் கூறினர்.