ஐஸ் பெட்டியில் மதுபாட்டில் கடத்தியவர் கைது

திட்டச்சேரி:

திட்டச்சேரியில் ஐஸ் பெட்டியில் வைத்து மதுபாட்டில் கடத்தியவரை போலீசார் கைது செய்தனர். மேலும் கடத்தலுக்கு பயன்படுத்திய மோட்டார் சைக்கிளை பறிமுதல் செய்தனர்.

ஐஸ்பெட்டியில் மதுபாட்டில்

புதுச்சேரி மாநிலத்தில் இருந்து நாகை வழியாக தமிழகத்தின் பிற பகுதிகளுக்கு சாராயம் கடத்தப்படுவதாக போலீசாருக்கு தகவல் கிடைத்தது. இதன்பேரில் நாகை மாவட்ட போலீஸ் சூப்பிரண்டு ஹர்ஷ் சிங் உத்தரவின்படி, நாகை மாவட்டத்தின் பல்வேறு பகுதிகளில் போலீசார் தீவிர கண்காணிப்பு மற்றும் சோதனையில் ஈடுப்பட்டனர். அதன்படி திட்டச்சேரி மெயின்ரோடு பகுதியில் போலீஸ் சப்-இன்ஸ்பெக்டர் பாலமுருகன் மற்றும் போலீசார் வாகன சோதனை மற்றும் ரோந்து பணியில் ஈடுபட்டனர்.

அப்போது திட்டச்சேரி போலீஸ் நிலையம் அருகே வேகமாக ஒரு மோட்டார் சைக்கிள் வந்தது. சந்தேகத்தின்பேரில் அந்த மோட்டார் சைக்கிளை வழிமறித்து போலீசார் சோதனை நடத்தினர். சோதனையில் மோட்டார் சைக்கிளில் இருந்த ஐஸ் பெட்டியில் 400 மதுபாட்டில்கள் இருந்தது தெரியவந்தது.

கைது

இதை தொடர்ந்து அவரிடம் விசாரணை நடத்தினர். இதில் அவர் வெளிப்பாளையம் செல்லூர் சுனாமி குடியிருப்பு பகுதியை சேர்ந்த பாதர் வெள்ளை (வயது 59) என்பதும், இவர் காரைக்கால் பகுதியில் இருந்து மதுபாட்டில்களை நாகை பகுதிக்கு கடத்தி சென்றதும் தெரிய வந்தது.

இதுகுறித்து போலீசார் வழக்குப்பதிவு செய்து பாதர் வெள்ளையை கைது செய்தனர். மேலும் அவரிடம் இருந்த மதுபாட்டில்கள் மற்றும் கடத்தலுக்கு பயன்படுத்திய மோட்டார் சைக்கிளையும் பறிமுதல் செய்தனர்.