வழுக்கி விழுந்து காட்டு யானை சாவு

வால்பாறை

வால்பாறை வனப்பகுதியில் காட்டு யானை வழுக்கி விழுந்து இறந்தது.

காட்டு யானை சாவு

ஆனைமலை புலிகள் காப்பகத்திற்கு உட்பட்ட வால்பாறை வனச்சரக பகுதியில் அக்காமலை புல்மேடு வனப்பகுதி உள்ளது. இந்த வனப்பகுதியில் வால்பாறை வனச்சரக வனத்துறையினர் நேற்று காலை வழக்கம்போல ரோந்து பணியில் ஈடுபட்டிருந்தனர்.

அப்போது அக்காமலை புல்மேடு வனப்பகுதியில் ஆட்டுப்பாதை குறுக்கு வனச்சுற்றில் ஆண் காட்டு யானை ஒன்று இறந்து கிடந்தது. இதனை பார்த்த வனத்துறையினர் உயர் அதிகாரிகளுக்கு தகவல் கொடுத்தனர்.

வழுக்கி விழுந்து இறந்தது

இதையடுத்து வனச்சரகர் வெங்கடேஷ் சம்பவ இடத்தை ஆய்வு செய்தார். தொடர்ந்து ஆனைமலை புலிகள் காப்பகத்தின் துணை கள இயக்குனர் கணேசனுக்கு தகவல் கொடுக்கப்பட்டது.

இந்த சம்பவம் குறித்து வனத்துறையினர் கூறியதாவது:-

வனப்பகுதியில் கனமழை பெய்து கொண்டிருந்ததால் ஆண் காட்டு யானை வழுக்கி விழுந்ததில் இறந்திருக்கலாம். ஆனாலும் யானையின் உடலை பிரேத பரிசோதனை செய்த பிறகே யானை இறந்ததற்கான முழு விவரம் தெரியவரும். இவ்வாறு அவர்கள் கூறினர்.

இன்று (ஞாயிற்றுக்கிழமை) உடல் பிரேத பரிசோதனை செய்யப்படுவதாக வனத்துறையினர் தெரிவித்துள்ளனர்.