9 மீனவர்கள் ராமேசுவரம் வந்தனர்

ராமேசுவரம், 

இலங்கை சிறையில் இருந்து விடுதலை செய்யப்பட்ட மீனவர்கள் 9 பேர் ராமேசுவரம் அழைத்து வரப்பட்டனர்.

9 மீனவர்கள் கைது

ராமேசுவரத்தில் இருந்து கடந்த ஜூன் மாதம் 19-ந் தேதி தங்கச்சிமடத்தை சேர்ந்த அந்தோணி என்பவருக்கு சொந்தமான விசைப்படகு ஒன்றில் 9 மீனவர்கள் மீன்பிடிக்க கடலுக்கு சென்றனர். கச்சத்தீவு அருகே உள்ள நடுக்கடலில் மீன்பிடித்து கொண்டிருந்தபோது அவர்களின் படகு என்ஜின் திடீரென பழுதாகி நின்றது.

இதனிடையே கடல் நீரோட்டம் மற்றும் காற்றின் வேகம் காரணமாக படகானது இலங்கை நெடுந்தீவை ஒட்டிய கடல் பகுதியில் பாறை மீது ஏறி நின்றது. அப்போது அங்கு ரோந்து வந்த இலங்கை கடற்படையினர் படகில் இருந்த 9 மீனவர்களையும் கைது செய்து மெரிகானா கடற்படை முகாமுக்கு அழைத்து சென்றனர். தொடர்ந்து 9 மீனவர்களும் நீதிமன்றத்தில் ஆஜர்படுத்தப்பட்டனர்.

விமானம் மூலம் வந்தனர்

விசாரணையில் படகு பழுதாகி காற்றின் வேகத்தால் இலங்கை கடல் பகுதிக்குள் மீனவர்கள் படகு வந்தது உறுதி செய்யப்பட்டது. அதை தொடர்ந்து 9 மீனவர்களையும், படகையும் விடுதலை செய்து கோர்ட்டு உத்தரவிட்டது. விடுதலை செய்யப்பட்ட 9 மீனவர்களும் இலங்கை யாழ்ப்பாணத்தில் உள்ள இந்திய துணை தூதரக அதிகாரிகள் வசம் ஒப்படைக்கப்பட்டு தங்க வைக்கப்பட்டிருந்தனர்.

இதனிடையே ராமேசுவரத்தை சேர்ந்த 9 மீனவர்களும் இலங்கை கொழும்பில் இருந்து விமானம் மூலம் சென்னைக்கு அனுப்பி வைக்கப்பட்டனர். அவர்கள் நேற்று காலை சென்னை விமான நிலையம் வந்திறங்கினார்கள். தொடர்ந்து அங்கிருந்து மீன்துறை அதிகாரிகள் ஏற்பாடு செய்த வாகனம் மூலம் ராமேசுவரம் அழைத்துவரப்பட்டு உறவினர்களிடம் ஒப்படைக்கப்பட்டு வீடுகளுக்கு அனுப்பி வைக்கப்பட்டனர். மேலும், மீனவர்களின் படகை அரசு அனுமதியுடன் விரைவில் மீட்க செல்ல உள்ளதாகவும் கூறப்படுகிறது.