பறவைகளை வேட்டையாடிய 4 பேர் கைது

கரியாப்பட்டினம்:

வேதாரண்யம் அருகே பறவைகளை வேட்டையாடிய 4 பேரை வனத்துறையினர் கைது செய்தனர். மேலும் அவர்களுக்கு தலா ரூ.50 ஆயிரம் அபராதம் விதித்தனர்.

ரோந்து பணி

வேதாரண்யம் பகுதியில் பறவைகள் வேட்டையாடப்படுவதாக வந்த புகாரின் பேரில் திருச்சி மண்டல தலைமை வனப்பாதுகாவலர் எஸ்.சதீஷ் உத்தரவின்படி வேதாரண்யம் வனச்சரக அலுவலர் ஆயூப்கான் தலைமையில் வனவர் ராமதாஸ், சதீஷ்குமார் வன காப்பாளர் ரணீஸ்குமார், வேட்டை தடுப்பு காவலர்கள் நிர்மல்ராஜ், நவநீதகிருஷ்ணன், பாண்டியன், லோகநாதன் ஆகியோர் கொண்ட குழுவினர் வேதாரண்யம் அருகே செம்போடை பகுதியில் ரோந்து பணியில் ஈடுபட்டனர்.

35 குயில் பறவைகள்

அப்போது அங்கு 2 பேர் கையில் சாக்கு பையுடன் நின்று கொண்டிருந்தனர். இதனால் சந்தேகம் அடைந்த வனத்துறையினர், அவர்களிடம் இருந்த சாக்கு பையை சோதனை செய்தனர். அதில் இறந்த நிலையில் 35 குயில் பறவைகள் இருந்தது.

இதை தொடர்ந்து 2 பேரிடம் விசாரணை நடத்தினர். விசாரணையில் அவர்கள், தோப்புத்துறை பகுதியை சேர்ந்த ஷேக், சாகுல் அமீது என்பதும், இவர்கள் தோப்புத்துறையை சேர்ந்த ஜாஹீர் உசேன், விழுந்தமாவடியை சேர்ந்த முத்துசாமியிடம் குயில்களை வாங்கியதும் தெரிய வந்தது.

4 பேர் கைது; தலா ரூ.50 ஆயிரம் அபராதம்

இதைதொடர்ந்து ஜாஹீர் உசேன், முத்துசாமியை பிடித்து விசாரணை நடத்தினர். இதில் இவர்கள் குயில்களை வேட்டையாடி ஷேக், சாகுல் அமீதுவிடம் விற்பனை செய்தது தெரிய வந்தது.

இதுகுறித்து வனத்துறையினர் வழக்குப்பதிவு செய்து 4 பேரையும் கைது செய்தனர். பின்னர் நாகை வன உயிரின காப்பாளர் யோகேஷ்குமார் மீனா உத்தரவுப்படி 4 பேருக்கு தலா ரூ.50 ஆயிரம் வீதம் ரூ.2 லட்சம் அபராதம் விதிக்கப்பட்டது.