சேலத்தில் வெவ்வேறு சாலை விபத்துகளில்
சேலத்தில் வெவ்வெறு இடங்களில் நடந்த சாலை விபத்துகளில் வடமாநில வாலிபர் உள்பட 3 பேர் பலியாகினார்.
வடமாநில வாலிபர் பலி
மத்திய பிரதேச மாநிலம் குவாலியர் பகுதியை சேர்ந்தவர் தருண்சிங் (வயது 25). இவர் சேலம் எஸ்.நாட்டாமங்கலம் பகுதியில் தங்கியிருந்து தனியார் நிறுவனத்தில் வேலை பார்த்து வந்தார். தருண்சிங் நேற்று முன்தினம் இரவு திருவாக்கவுண்டனூர் பகுதியில் மோட்டார் சைக்கிளில் சென்று கொண்டிருந்தார்.
அப்போது அந்த வழியாக வந்த அடையாள தெரியாத வாகனம் அவரது மோட்டார் சைக்கிள் மீது மோதிவிட்டு நிற்காமல் சென்றது. இதில் தூக்கி வீசப்பட்டு படுகாயம் அடைந்த தருண்சிங் சம்பவ இடத்திலேயே பரிதாபமாக இறந்தார். இந்த விபத்து குறித்து சூரமங்கலம் போலீசார் வழக்குப்பதிவு செய்து விசாரணை நடத்தி வருகின்றனர்.
லாரி மோதியது
சேலம் அழகாபுரம் பகுதியை சேர்ந்தவர் பாஸ்கரன் (55). இவர் நேற்று முன்தினம் மோட்டார் சைக்கிளில் உடையாப்பட்டி பகுதியில் சென்று கொண்டிருந்தார். அப்போது அந்த வழியாக வந்த லாரி, மோட்டார் சைக்கிள் மீது மோதியது.
இதில் தலையில் பலத்த காயம் அடைந்த பாஸ்கரன் சம்பவ இடத்திலேயே இறந்தார். விபத்து குறித்து அம்மாபேட்டை போலீசார் வழக்குப்பதிவு செய்து விசாரணை நடத்தி வருகின்றனர்.
மற்றொரு விபத்து
சேலம் வீராணம் பகுதியை சேர்ந்தவர் தினேஷ் (35). இவர் மோட்டார் சைக்கிளில் வாய்க்கால்பட்டறை பகுதியில் சென்று கொண்டிருந்தார். அப்போது அவரது மோட்டார் சைக்கிள் அங்கிருந்த வேகத்தடையில் ஏறி இறங்கிய போது நிலைதடுமாறி அவர் கீழே விழுந்தார்.
இதில் படுகாயம் அடைந்த அவரை அந்த வழியாக வந்தவர்கள் மீட்டு சிகிச்சைக்காக சேலம் அரசு ஆஸ்பத்திரியில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்தனர். ஆனால் சிகிச்சை பலனின்றி நேற்று முன்தினம் தினேஷ் இறந்தார்.
இந்த விபத்து குறித்து வீராணம் போலீசார் விசாரணை நடத்தி வருகின்றனர்.