திருவள்ளூர் அருகே 3 மோட்டார் சைக்கிள்களுக்கு தீ வைப்பு

திருவள்ளூர் அடுத்த ஈக்காடு வி.கே.என்.நகர் முதல் தெருவில் வசிப்பவர் தமிழரசன் (வயது 50). இவரது மனைவி மதி. இவர் திருவள்ளூர் மாவட்ட நூலகத்தில் பணியாற்றி வருகிறார். இவர்களுக்கு சரண், சந்துரு என 2 மகன்கள் உள்ளனர்.

இந்த நிலையில் தமிழரசன் மற்றும் அவரது 2 மகன்கள் என 3 பேரும் தங்களது 3 மோட்டார் சைக்கி்ள்களை தனித்தனியாக பயன்படுத்தி வந்தனர். இந்த நிலையில் நேற்று முன்தினம் இரவு 3 மோட்டார் சைக்கிள்களையும் வீட்டு வாசலில் நிறுத்தி வைத்துவிட்டு தூங்க சென்றுள்ளனர்.

நள்ளிரவு 12 மணியளவில் வீட்டு வாசலில் சத்தம் கேட்கவே அவர்கள் எழுந்து வந்து பார்த்த போது 3 மோட்டார் சைக்கிள்களும் எரிந்துக் கொண்டிருந்ததை கண்டு அதிர்ச்சி அடைந்தனர். மளமளவென பரவிய தீயால் 3 மோட்டார் சைக்கிள்களும் முற்றிலும் எரிந்து நாசமானது.

இது குறித்து புல்லரம்பாக்கம் போலீசில் புகார் செய்யப்பட்டது. போலீசார் இது சம்பந்தமாக வழக்குப்பதிவு செய்து மர்மநபர்கள் யாரேனும் மோட்டார் சைக்கிள்களுக்கு தீ வைத்தனரா? என்று விசாரித்து வருகின்றனர்.