மதுரை-சிங்கப்பூர் இடையேயான நேரடி விமான சேவை இன்று மீண்டும் தொடங்கியது

மதுரை,

கொரோனா தொற்று பரவல் காரணமாக நாடு முழுவதும் சர்வதேச விமான சேவைக்கு பல்வேறு கட்டுப்பாடுகள் விதிக்கப்பட்டன. தற்போது கொரோனா தொற்று குறைந்து வரும் நிலையில் இந்த கட்டுப்பாடுகள் தளர்த்தப்பட்டுள்ளன.

இந்த நிலையில், கொரோனா காரணமாக தடை செய்யப்பட்டிருந்த மதுரை - சிங்கப்பூர் இடையேயான நேரடி விமான சேவை இன்று மீண்டும் தொடங்கியுள்ளது. அதன் படி சிங்கப்பூரில் இருந்து (சிங்கப்பூர் நேரப்படி) மாலை 5 மணிக்கு புறப்படும் விமானம், மாலை 6.40 மணிக்கு மதுரை விமான நிலையம் வந்தடையும் எனவும் அதே விமானம் மதுரையில் இருந்து இரவு 9.35 மணிக்கு புறப்பட்டு சிங்கப்பூர் சென்றடையும் என விமான நிலைய அதிகாரிகள் தெரிவித்துள்ளனர்.

இன்று முதல் வாரத்திற்கு 2 நாட்கள் (செவ்வாய் மற்றும் சனிக்கிழமை), சிங்கப்பூருக்கு மீண்டும் விமானம் இயக்க ஏர் இந்தியா விமானம் முடிவு செய்துள்ளது. மதுரை-சிங்கப்பூர் விமான சேவை மீண்டும் தொடங்கி உள்ளதால் பயணிகள் மகிழ்ச்சி அடைந்துள்ளனர்.