பெண் குழந்தைகள் மீதான கொடூரங்களுக்கு முற்றுப்புள்ளி வைக்கப்பட வேண்டும் - மு.க.ஸ்டாலின் ‘டுவிட்டர்’ பதிவு

சென்னை,

புதுக்கோட்டை மாவட்டம் அறந்தாங்கி அருகே 7 வயது சிறுமியின் உடல், பாலியல் வன்கொடுமைக்கு ஆளாக்கப்பட்ட நிலையில் ரத்த காயங்களுடன் வறண்ட குளம் ஒன்றில் இருந்து கண்டெடுக்கப்பட்டு இருப்பது அதிர்ச்சியையும் வேதனையையும் ஏற்படுத்துகிறது. ஜூன் 29-ந்தேதி மாலையில் விளையாடச் சென்ற சிறுமி இரவு நேரமாகியும் வீடு திரும்பவில்லை என்பதால் அவரது பெற்றோரும், அக்கம்பக்கத்தினரும் தேடி அலைந்து ஜூலை 2-ந்தேதி காலையில் உயிரற்ற உடலை கண்டெடுத்துள்ளார்கள். ஒருவர் கைது செய்யப்பட்டிருக்கிறார்.

சில வாரங்களுக்கு முன்புதான் இதே புதுக்கோட்டை மாவட்டத்தில் மற்றொரு சிறுமி படுகொலைக்கு உள்ளானது தாமதமாக வெளியே தெரியவந்தது. இப்போது மீண்டும் ஒரு சிறுமி. இத்தகைய சம்பவங்கள் தமிழகத்தில் பெண்களுக்கும், பெண் குழந்தைகளுக்குமான பாதுகாப்பு குறித்த கேள்விகளையும், அச்சத்தையும் ஏற்படுத்துகிறது. பெண்கள், சிறுமிகள், பொதுமக்களின் பாதுகாப்பு மீது அக்கறை காட்டவேண்டும் இத்தகைய கொடூரங்களுக்கு உடனடியாக முற்றுப்புள்ளி வைக்கப்பட வேண்டும். இவ்வாறு அவர் கூறியுள்ளார்.