ராயக்கோட்டை
கெலமங்கலம் அருகே மோட்டார்சைக்கிள் மீது அடையாளம் தெரியாத வாகனம் மோதி 2 பேர் பலியானார்கள்.
விபத்து
கிருஷ்ணகிரி மாவட்டம் கெலமங்கலம் சவுடேஸ்வரி கோவில் தெருவை சேர்ந்தவர் கோவிந்தப்பா. இவரது மகன் திம்மைய்யா (வயது 23). அதே பகுதியில் உள்ள மாரியம்மன் கோவில் தெருவை சேர்ந்தவர் கிருஷ்ணப்பா. இவரது மகன் சிவக்குமார் (24). கட்டிட தொழிலாளிகள். இவர்கள் 2 பேரும் நேற்று முன்தினம் மாலை மோட்டார்சைக்கிளில் கெலமங்கலம்-தேன்கனிக்கோட்டை சாலையில் சென்று கொண்டு இருந்தனர். மோட்டார்சைக்கிளை சிவக்குமார் ஓட்ட, திம்மைய்யா பின்னால் அமர்ந்திருந்தார்.
கெலமங்கலம் துளசி நகரில் உள்ள அரசு மதுகடைக்கு அருகில் வளைவு சாலையில் இவர்கள் சென்று கொண்டு இருந்தனர். அப்போது தேன்கனிக்கோட்டையில் இருந்து கெலமங்கலம் நோக்கி வந்த அடையாளம் தெரியாத வாகனம் மோட்டார்சைக்கிள் மீது மோதியது.
2 பேர் பலி
இந்த விபத்தில் மோட்டார்சைக்கிளில் சென்ற 2 பேரும் தூக்கி வீசப்பட்டனர். இதில் திம்மைய்யா படுகாயமடைந்து, சம்பவ இடத்திலேயே பரிதாபமாக இறந்தார். சிவக்குமார் படுகாயமடைந்தார். இதையடுத்து அக்கம் பக்கத்தினர் அவரை மீட்டு சிகிச்சைக்காக ஓசூர் அரசு ஆஸ்பத்திரிக்கு அனுப்பி வைத்தனர். அங்கு தீவிர சிகிச்சை அளித்தும் பலனின்றி சிவக்குமார் பரிதாபமாக இறந்தார்.
இந்த விபத்து குறித்து திம்மைய்யாவின் தாயார் ரத்தினம்மா கெலமங்கலம் போலீசில் புகார் செய்தார். அதன்பேரில் போலீசார் சம்பவ இடத்திற்கு சென்று 2 பேரின் உடல்களையும் கைப்பற்றி பிரேத பரிசோதனைக்கு அனுப்பி வைத்தனர். இந்த விபத்து குறித்து போலீஸ் இன்ஸ்பெக்டர் ஜாபர் உசேன், சப்-இன்ஸ்பெக்டர் தினேஷ் ஆகியோர் வழக்குப்பதிவு செய்து விசாரணை நடத்தி வருகிறார்கள்.