கொலை மிரட்டல் விடுத்த 2 பேர் கைது

தூத்துக்குடி துணை போலீஸ் சூப்பிரண்டு சத்தியராஜ் மேற்பார்வையில் தென்பாகம் இன்ஸ்பெக்டர் ராஜாராம் தலைமையிலான போலீசார் ரோந்து பணியில் ஈடுபட்டனர். அப்போது தூத்துக்குடி எப்.சி.ஐ. குடோன் அருகில் சந்தேகத்திற்கிடமான முறையில் நின்று கொண்டிருந்த 2 பேரை பிடித்து விசாரணை செய்தனர். அதில் அவர்கள் தூத்துக்குடி சண்முகபுரம் பகுதியை சேர்ந்த சரவணன் மகன் எலும்பு அருண் என்ற ஜெயக்குமார் (வயது 20), தூத்துக்குடி முனியசாமிபுரம் லோகியாநகர் பகுதியை சேர்ந்த முருகன் மகன் பிரபாகரன் (23) என்பதும், அவர்கள் அப்பகுதியில் வந்து கொண்டிருந்த ஒருவரை வழிமறித்து பணம் கேட்டு தகராறு செய்து அரிவாளை காட்டி கொலை மிரட்டல் விடுத்ததும் தெரியவந்தது.

உடனே போலீசார், ஜெயக்குமார், பிரபாகரனை கைது செய்தனர். மேலும் இதுகுறித்து தென்பாகம் போலீசார் வழக்கு பதிவு செய்து விசாரணை மேற்கொண்டு வருகின்றனர்.