ரூ.18½ லட்சம் தங்கம் பறிமுதல்

செம்பட்டு:

பயணிகளிடம் சோதனை

திருச்சி விமான நிலையத்தில் இருந்து பல்வேறு வெளிநாடுகளுக்கு விமானங்கள் சென்று வருகின்றன. இதில் மலேசியா, சிங்கப்பூர், துபாய் உள்ளிட்ட நாடுகளில் இருந்து வரும் பயணிகள் தங்கத்தை கடத்தி வருவது தொடர்கதையாக இருந்து வருகிறது.

இந்நிலையில் நேற்று சிங்கப்பூரில் இருந்து ஸ்கூட் விமானம் திருச்சி வந்தது. இந்த விமானத்தில் வந்த பயணிகளை சுங்கத்துறை அதிகாரிகள் சோதனை செய்தனர்.

கிரைண்டர் எந்திரத்தில்...

அப்போது ஆண் பயணி ஒருவர் கொண்டு வந்த கிரைண்டர் எந்திரத்தின் மீது அதிகாரிகளுக்கு சந்தேகம் ஏற்பட்டது. இதையடுத்து அந்த எந்திரத்தை சோதனை செய்தபோது, அதில் தங்கத்தை மறைத்து கடத்தி வந்தது தெரியவந்தது.

இதைத்தொடர்ந்து அந்த பயணியிடமும் சோதனை நடத்தப்பட்டது. இதையடுத்து மொத்தம் ரூ.18 லட்சத்து 54 ஆயிரம் மதிப்பிலான 347.50 கிராம் தங்கத்தை சுங்கத்துறை அதிகாரிகள் பறிமுதல் செய்தனர். மேலும் அந்த பயணியிடம் தொடர்ந்து விசாரணை மேற்கொண்டு வருகின்றனர்.