இந்தியா கூட்டணியில் முன்னேற்றம் இல்லை, காங். கட்சிக்கு... நிதிஷ் குமார் விமர்சனம்

பாட்னா,

நாடாளுமன்ற தேர்தலில் பாஜகவுக்கு எதிராக காங்கிரஸ் உள்ளிட்ட சுமார் 28 கட்சிகள் பிரமாண்ட கூட்டணி அமைத்து உள்ளன. 'இந்தியா' என்ற பெயரில் இணைந்துள்ள இந்த கட்சிகள் அடுத்தடுத்து 3 கூட்டங்களை கூட்டி ஆலோசனை நடத்தி உள்ளன.கடந்த ஆகஸ்டு 31 மற்றும் செப்டம்பர் 1-ந்தேதி 3-வது ஆலோசனைக் கூட்டம் நடந்த நிலையில், அதன்பிறகு இந்தியா கூட்டணி தலைவர்களின் சந்திப்பு நிகழவில்லை. மத்திய பிரதேசத்தில் ஏற்பாடு செய்யப்பட்ட பொதுக்கூட்டமும் ரத்து செய்யப்பட்டது.

இந்த சூழலில் மத்திய பிரதேசம், ராஜஸ்தான் உள்ளிட்ட 5 மாநிலங்களுக்கு சட்டசபை தேர்தல் அறிவிக்கப்பட்டதால், இந்த தேர்தல் பணிகளில் காங்கிரஸ் உள்ளிட்ட கட்சிகள் மும்முரம் காட்டி வருகின்றன. இந்த நிலையில், பீகார் முதல்-மந்திரியும், ஐக்கிய ஜனதாதள தலைவருமான நிதிஷ்குமார், இந்தியா கூட்டணியில் தேக்க நிலை நிலவுவதற்கு காங்கிரஸ் மீது குற்றம் சாட்டியுள்ளார். இது தொடர்பாக நிதிஷ் குமார் கூறியதாவது:

தற்போதைய மத்திய அரசை எதிர்க்கும் கட்சிகள் இணைந்து இந்தியா கூட்டணியை உருவாக்கின. ஆனால் சமீப காலமாக இந்த நடவடிக்கைகளில் பெரிய முன்னேற்றம் ஏற்படவில்லை. காங்கிரஸ் கட்சி 5 மாநில சட்டசபை தேர்தல்களில்தான் அதிக ஆர்வம் காட்டி வருவதாக தெரிகிறது. இந்தியா கூட்டணியில், காங்கிரசுக்கு முக்கியப் பங்கு வழங்க நாங்கள் அனைவரும் ஒப்புக்கொண்டோம். ஆனால் அவர்கள் 5 மாநில சட்டசபை தேர்தலுக்குப் பிறகுதான் அடுத்த கூட்டத்தை அழைப்பார்கள் என்று தெரிகிறது"என்று கூறினார்.