எதிர்க்கட்சிகளால் அவை முடங்குகிறது என்பது தவறு - திருச்சி சிவா

புதுடெல்லி,

மாநிலங்களவை தி.மு.க. குழுத்தலைவர் திருச்சி சிவா டெல்லியில் நேற்று நிருபர்களுக்கு பேட்டி அளித்தார். அப்போது அவர் கூறியதாவது:-

கடந்த 9 நாட்களாக நாடாளுமன்றத்தின் 2 அவைகளிலும் அவை நடவடிக்கைகள் நடைபெறவில்லை. காரணம் மணிப்பூர் விவகாரம். மணிப்பூரில் இரு குழுக்களுக்கு ஏற்பட்ட மோதல் கலவரமாகி 150 பேர் கொல்லப்பட்டனர். பல்லாயிரக்கணக்கானோர் காயமடைந்தனர். 75 ஆயிரத்துக்கும் மேற்பட்டவர்கள் காடுகள் மற்றும் முகாம்களில் தங்கி உள்ளனர்.

குறிப்பாக 2 பழங்குடியின பெண்களுக்கு நேர்ந்த வன்கொடுமை உலகத்தையே பதற வைத்தது. மிகப்பெரிய பிரச்சினையாக பார்க்கப்படும் இந்த விவகாரம் தொடர்பாக ஒரு நாட்டின் பிரதமர் இதுவரை ஒரு அறிக்கை கூட வெளியிடவில்லை. பிரதமர் மோடி 267-வது விதியின் கீழ் விளக்கம் அளிக்கவேண்டும். மற்ற விவாதங்கள் போல மணிப்பூர் தொடர்பான விவாதத்தை ஏற்க முடியாது.

மத்திய அரசு கூறுவது போல, 176-வது விதியின் கீழ் விவாதம் நடத்தப்பட்டால், 2½ மணிநேரம் மட்டுமே விவாதம் நடைபெறும். நேரமின்மை காரணமாக மத்திய அரசு பதிலளிப்பதும் தவிர்க்கப்படலாம்.

எதிர்க்கட்சிகளால் அவை முடங்குகிறது எனக்கூறுவது முற்றிலும் பொய்யானது. பிரதமர் மோடி பொறுப்புணர்வுடன் அவைக்கு வந்து பேசவேண்டும். எதிர்க்கட்சிகள் விவாதத்துக்கு தயாராக இருக்கின்றன என்று அவர் கூறினார்.