டெல்லி: தொழிலதிபரிடம் ரூ.2 கோடி கேட்டு மிரட்டல்; பரோலில் வெளியே வந்த நபர் கைது
டெல்லியில் தொழிலதிபரிடம் ரூ.2 கோடி கேட்டு மிரட்டிய கவுரி மீது டெல்லி மற்றும் உத்தர பிரதேசத்தில் 25 வழக்குகள் உள்ளன.
புதுடெல்லி,
டெல்லியின் உத்தம் நகர் பகுதியை சேர்ந்த மின்னணு விற்பனை செய்யும் கடையின் உரிமையாளர் மற்றும் தொழிலதிபரான ஒருவரை வாட்ஸ்அப் அழைப்பு வழியே ஒரு கும்பல் தொடர்பு கொண்டு பேசியுள்ளது. மறுமுனையில் பேசிய நபர், அவரிடம் ரூ.2 கோடி பணம் வேண்டும். இல்லையென்றால் கொலை செய்து விடுவோம் என கூறி மிரட்டியுள்ளார்.
இதனால், பயந்து போன அந்த தொழிலதிபர் போலீசுக்கு சென்றார். இதுபற்றி ஜானக்புரி காவல் நிலையத்தில் புகார் பதிவானது. விசாரணையில், நீரஜ் பாவனா என்ற கும்பலை சேர்ந்தவர்கள் மிரட்டல் விடுத்தனர் என தெரிய வந்தது.
இதில், மிரட்டல் விடுத்தவர் முகமது பர்வேஷ் என்ற சதாம் என்ற கவுரி (வயது 35) என தெரிய வந்தது. இவர், நீரஜ் பாவனா கும்பலை சேர்ந்தவர். உத்தர பிரதேசத்தின் மீரட் நகரை சேர்ந்த கவுரி, பிணையில் வெளியே வந்த நிலையில், இந்த மிரட்டலில் ஈடுபட்டு உள்ளார்.
இதுபற்றி துணை காவல் ஆணையாளர் சஞ்சய் குமார் கூறும்போது, டெல்லியின் குற்ற பிரிவு போலீசார் நடத்திய அதிரடி சோதனையின் கீழ், டெல்லி கரம்புரா பகுதியில் உள்ள அடுக்குமாடி குடியிருப்பில் வைத்து கவுரி கைது செய்யப்பட்டார். அவரிடம் இருந்து 2 பிஸ்டல்கள், வெடிக்க தயார் நிலையில் உள்ள 12 தோட்டாக்கள் உள்ளிட்டவை கைப்பற்றப்பட்டன என்றார்.
கவுரி மீது டெல்லி மற்றும் உத்தர பிரதேசத்தில் 25 வழக்குகள் உள்ளன. இந்த சம்பவம் பற்றி போலீசார் தொடர்ந்து விசாரணை நடத்தி வருகின்றனர்.