கோவா மாநிலத்தில் ஆட்சி அமைக்க பா.ஜனதா இன்று உரிமை கோருகிறது

பனாஜி, 

கோவா மாநில சட்டசபை தேர்தலில் பா.ஜனதா 20 தொகுதிகளில் வெற்றி பெற்று ஆட்சியை தக்க வைத்துள்ளது. 3 சுயேச்சை எம்.எல்.ஏ.க்களும், மகாராஷ்டிரவாடி கோமந்தக் கட்சியின் 2 எம்.எல்.ஏ.க்களும் பா.ஜனதாவுக்கு ஆதரவு தெரிவித்துள்ளனர்.

இந்நிலையில், பா.ஜனதா புதிய எம்.எல்.ஏ.க்கள் கூட்டம் இன்று மாலை 4 மணிக்கு நடக்கிறது. மேலிட பார்வையாளர்களான மத்திய மந்திரிகள் நரேந்திரசிங் தோமர், எல்.முருகன், தேர்தல் பொறுப்பாளர் தேவேந்திர பட்னாவிஸ், சி.டி.ரவி உள்ளிட்டோர் கலந்து கொள்கிறார்கள்.

அதில், சட்டசபை கட்சி தலைவர் (முதல்-மந்திரி) தேர்ந்தெடுக்கப்படுகிறார். பின்னர், கட்சி தலைவர்கள் கவர்னர் ஸ்ரீதரன் பிள்ளையை சந்தித்து ஆட்சி அமைக்க உரிமை கோருகிறார்கள்.

புதிய அரசு பதவி ஏற்கும் தேதி, கவர்னரை சந்தித்த பிறகு முடிவு செய்யப்படும் என்று மாநில பா.ஜனதா தலைவர் சதானந்த் ஷெட் தனவாடே தெரிவித்தார்.