ஆஸ்திரேலிய ஓபன் டென்னிஸ்: கேஸ்பர் ரூட் 2வது சுற்றுக்கு முன்னேற்றம்
ஆஸ்திரேலிய ஓபன் டென்னிஸ் தொடர் மெல்போர்னில் இன்று தொடங்கி 26-ந் தேதி வரை நடக்கிறது.;
மெல்போர்ன்,
டென்னிசில் ஆண்டுதோறும் ஆஸ்திரேலிய ஓபன், பிரெஞ்சு ஓபன், விம்பிள்டன், அமெரிக்க ஓபன் என 4 வகையான கிராண்ட்ஸ்லாம் என்ற உயரிய அந்தஸ்து பெற்ற போட்டிகள் நடத்தப்படுகின்றன. இதன்படி இந்த ஆண்டின் முதல் கிராண்ட்ஸ்லாம் போட்டியான ஆஸ்திரேலிய ஓபன் டென்னிஸ் தொடர் மெல்போர்னில் இன்று தொடங்கி 26-ந் தேதி வரை நடக்கிறது.
இன்று முதல் சுற்று ஆட்டங்கள் நடைபெற்று வருகின்றன. இதில் ஆண்கள் ஒற்றையர் பிரிவில் இன்று நடைபெற்ற முதல் சுற்று ஆட்டம் ஒன்றில் நார்வேயின் கேஸ்பர் ரூட், ஸ்பெயினின் ஜாம் முனார் உடன் மோதினார். இந்த ஆட்டத்தின் முதல் மற்றும் 3வது செட்டை 6-3, 7-5 என்ற புள்ளிக்கணக்கில் கேஸ்பர் ரூட்டும், 2வது மற்றும் 4வது செட்டை 6-1, 6-2 என்ற புள்ளிக்கணக்கில் ஜாம் முனாரும் கைப்பற்றினர்.
இதையடுத்து வெற்றியாளரை தீர்மானிக்கும் 5வது செட் மிகவும் விறுவிறுப்பாக நடைபெற்றது. இந்த ஆட்டத்தில் அபாரமாக விளையாடிய கேஸ்பர் ரூட் 6-1 என்ற புள்ளிக்கணக்கில் ஜாம் முனாரை வீழ்த்தி வெற்றி பெற்று 2வது சுற்றுக்கு முன்னேறினார்.