தேசிய சீனியர் ஆக்கி: காலிறுதியில் தமிழக அணி தோல்வி

 சென்னை,

14-வது ஆக்கி இந்தியா தேசிய சீனியர் ஆண்கள் சாம்பியன்ஷிப் போட்டி சென்னை எழும்பூரில் உள்ள மேயர் ராதாகிருஷ்ணன் ஸ்டேடியத்தில் நடந்து வருகிறது. இதில் பங்கேற்ற 30 மாநில அணிகள் 8 பிரிவாக பிரிக்கப்பட்டு லீக்கில் மோதின. லீக் சுற்று முடிவில் பஞ்சாப் (ஏ), அரியானா (பி), தமிழ்நாடு (சி), கர்நாடகா (டி), ஒடிசா (இ), உத்தரபிரதேசம் (எப்), மராட்டியம் (ஜி), மணிப்பூர் (எச்) ஆகிய அணிகள் தங்கள் பிரிவில் முதலிடம் பிடித்து காலிறுதிக்கு முன்னேறின.

இதில் நேற்று நடைபெற்ற காலிறுதி ஆட்டம் ஒன்றில் தமிழக அணி, உத்தரபிரதேசத்தை எதிர்கொண்டது. இதில் தமிழக அணி 1-3 என்ற கோல் கணக்கில் உத்தரபிரதேசத்திடம் தோற்று ஏமாற்றம் அளித்தது. மற்ற காலிறுதி ஆட்டங்களில் மணிப்பூர் , அரியானா, ஒடிசா அணிகள் வெற்றி பெற்று அரையிறுதி சுற்றுக்கு தகுதி பெற்றன .