2-வது டி20 போட்டி: பட்லர் அதிரடி.. வெஸ்ட் இண்டீசை வீழ்த்திய இங்கிலாந்து
இங்கிலாந்து கேப்டன் பட்லர் அதிரடியாக விளையாடி 83 ரன்கள் எடுத்தார்.
பார்படாஸ்,
இங்கிலாந்து கிரிக்கெட் அணி வெஸ்ட் இண்டீஸில் சுற்றுப்பயணம் மேற்கொண்டு 3 ஒருநாள் மற்றும் 5 டி20 போட்டிகள் கொண்ட தொடரில் ஆடி வருகிறது. இதில் முதலில் நடைபெற்ற ஒருநாள் தொடரை 2-1 என்ற கணக்கில் வெஸ்ட் இண்டீஸ் கைப்பற்றியது. இதையடுத்து இவ்விரு அணிகள் இடையிலான டி20 தொடர் நடைபெற்று வருகிறது. முதல் டி20 போட்டியில் இங்கிலாந்து அணி வெற்றிபெற்று இருந்தது.
இந்த நிலையில், இரு அணிகளுக்கும் இடையிலான 2-வது டி20 போட்டி இன்று நடைபெற்றது. இதில் டாஸ் வென்ற இங்கிலாந்து அணி பந்துவீச்சை தேர்வுசெய்தது. அதன்படி முதலில் களமிறங்கிய வெஸ்ட் இண்டீஸ் அணி, 20 ஓவர்கள் முடிவில் 8 விக்கெட் இழப்புக்கு 158 ரன்கள் எடுத்தது. கேப்டன் ரோவ்மேன் பவல் அதிகபட்சமாக 43 ரன்கள் எடுத்தார்.
இதையடுத்து 159 ரன்கள் எடுத்தால் வெற்றி என்ற இலக்குடன் களமிறங்கிய இங்கிலாந்து அணி, 14.5 ஓவர்களிலேயே வெற்றி இலக்கை கடந்தது. இதன் மூலம் 7 விக்கெட் வித்தியாசத்தில் அபார வெற்றி பெற்றது. கேப்டன் பட்லர் அதிரடியாக விளையாடி 83 ரன்கள் எடுத்தார். இந்த வெற்றியின் மூலம் இங்கிலாந்து அணி 5 போட்டிகள் கொண்ட தொடரில் 2-0 என்ற கணக்கில் முன்னிலை வகிக்கிறது.