பிரஜ்வல் ரேவண்ணாவை வேண்டுமென்றே மத்திய அரசு தப்ப வைத்துள்ளது - ராகுல் காந்தி குற்றச்சாட்டு

புதுடெல்லி,

முன்னாள் பிரதமர் தேவேகவுடாவின் பேரனும், முன்னாள் மந்திரி எச்.டி. ரேவண்ணா எம்.எல்.ஏ.வின் மகனுமான பிரஜ்வல் ரேவண்ணா எம்.பி., பாலியல் புகாரில் சிக்கி உள்ளார். பா.ஜனதா கூட்டணி சார்பில் நாடாளுமன்ற தேர்தலில் ஹாசன் தொகுதியில் மீண்டும் களமிறங்கி உள்ள பிரஜ்வல் ரேவண்ணா, தேர்தல் முடிந்ததும் ஜெர்மனிக்கு சென்றுவிட்டார்.

இதற்கிடையே அவர் சில பெண்களுடன் நெருக்கமாக இருக்கும் ஆபாச வீடியோக்கள் வெளியாகி பெரும் பரபரப்பை ஏற்படுத்தி உள்ளது. இதுதொடர்பாக பிரஜ்வல் ரேவண்ணா மீது ஒலேநரசிப்புரா டவுன் போலீசில் வழக்குப்பதிவாகி உள்ளது. மேலும் வேலைக்கார பெண்ணின் 16 வயது மகளுக்கு பாலியல் தொல்லை கொடுத்ததாக பிரஜ்வல் ரேவண்ணா மற்றும் அவரது தந்தை எச்.டி.ரேவண்ணா மீதும் வழக்கு பதிவாகி இருக்கிறது. இந்த சம்பவம் குறித்து சிறப்பு புலனாய்வு குழு (எஸ்.ஐ.டி.) போலீசார் விசாரித்து வருகிறார்கள். இதற்கிடையே பிரஜ்வல் ரேவண்ணா, ஜனதாதளம்(எஸ்) கட்சியில் இருந்து நீக்கப்பட்டார்.

பாலியல் புகார் தொடர்பாக விசாரணைக்கு ஆஜராக பிரஜ்வல் ரேவண்ணாவுக்கும், அவரது தந்தை எச்.டி.ரேவண்ணாவுக்கும் எஸ்.ஐ.டி. அதிகாரிகள் நோட்டீஸ் வழங்கி இருந்தனர். ஆனால், இருவரும் விசாரணைக்கு ஆஜராகவில்லை. தான் ஜெர்மனியில் இருப்பதால் விசாரணைக்கு ஆஜராக முடியவில்லை என பிரஜ்வல் ரேவண்ணா தனது முகநூல் (பேஸ்புக்) பக்கத்தில் பதிவிட்டு இருந்தார். மேலும் பிரஜ்வல் ரேவண்ணா 7 நாட்கள் காலஅவகாசம் கேட்டுள்ளார். ஆனால் அவருக்கு காலஅவகாசம் வழங்கப்படவில்லை என தெரிகிறது. இதற்கிடையே, பிரஜ்வல் ரேவண்ணாவை தேடப்படும் நபராக எஸ்.ஐ.டி. அறிவித்துள்ளது.

இதுதொடர்பாக உலகில் உள்ள அனைத்து விமான நிலையங்களுக்கும் பிரஜ்வல் ரேவண்ணா தேடப்படும் நபராக அறிவித்து 'லுக்-அவுட்' நோட்டீசையும் எஸ்.ஐ.டி. அனுப்பி உள்ளது. இதனால் பிரஜ்வல் ரேவண்ணா எந்த நேரத்திலும் கைது செய்யப்படலாம் என தகவல்கள் வெளியாகி உள்ளது.

இதற்கிடையே ரேவண்ணா தனக்கு முன்ஜாமீன் கோரி பெங்களூருவில் உள்ள மக்கள் பிரதிநிதிகள் சிறப்பு கோர்ட்டில் மனு தாக்கல் செய்தார். அந்த மனு மீது நேற்று முன்தினம் விசாரணை நடைபெற்றது. இதுகுறித்து பதிலளிக்கும்படி எஸ்.ஐ.டி.க்கு கோர்ட்டு நோட்டீஸ் அனுப்பியது. வழக்கு விசாரணை நேற்றைக்கு ஒத்திவைக்கப்பட்டது. அந்த சிறப்பு கோர்ட்டில் இந்த வழக்கு விசாரணைக்கு வந்தபோது, ரேவண்ணாவின் வக்கீல், கைது நடவடிக்கை எடுக்க வேண்டாம் என்று உத்தரவிடுமாறு கோரினார்.

அப்போது எஸ்.ஐ.டி. வக்கீல் ஆஜராகி, இந்த வழக்கில் 376-வது (பலாத்காரம்) சட்டப்பிரிவு சேர்க்கவில்லை என்றும், அதுபோல் ஜாமீனில் வெளிவர முடியாத வேறு பிரிவுகளையும் சேர்க்கவில்லை என்றும் கூறினார். இதையடுத்து ரேவண்ணாவின் வக்கீல், முன்ஜாமீன் கோரிய மனுவை வாபஸ் பெற்றார். இதற்கு நீதிபதி அனுமதி வழங்கினார். இதையடுத்து இந்த வழக்கு முடிவுக்கு வந்தது.

இந்நிலையில் ரேவண்ணா மீதான பலாத்கார வழக்கு தொடர்பாக, கர்நாடக முதல்-மந்திரி சித்தராமையாவுக்கு காங்கிரஸ் முன்னாள் தலைவர் ராகுல் காந்தி கடிதம் எழுதியுள்ளார்.

இதுதொடர்பாக அவர் எழுதியுள்ள கடிதத்தில், "பாதிக்கப்பட்டவர்களுக்கு சாத்தியமான அனைத்து ஆதரவையும் வழங்குமாறு கேட்டுக்கொள்கிறேன். இந்த கொடூரமான குற்றங்களுக்கு காரணமான அனைத்து தரப்பினரும் சட்டத்தின் முன் நிறுத்தப்படுவதை உறுதிசெய்யும் கூட்டுக் கடமை எங்களுக்கு உள்ளது.

கர்நாடகாவை உலுக்கும் ஆபாச வீடியோ வழக்கில், பிரஞ்வல் ரேவண்ணாவை மத்திய அரசு காப்பாற்றுகிறது. அவரை தப்பிச் செல்லவும் செய்துள்ளது. பாதிக்கப்பட்டவர்களை காப்பற்ற வேண்டும், குற்றவாளிகளை விரைவில் தண்டிக்க வேண்டும். உறுதியான நடவடிக்கை எடுக்க வேண்டும்" என்று கர்நாடகா முதல்-மந்திரி சித்தராமையாவுக்கு ராகுல் காந்தி கோரிக்கை விடுத்துள்ளார்.

இதனிடையே பிரஜ்வல் ரேவண்ணா வெளிநாடு தப்பிச் சென்றுள்ள நிலையில், அவருக்கு எதிராக விமான நிலையங்களுக்கு 2வது லுக் அவுட் நோட்டீஸ் கொடுக்கப்பட்டுள்ளது.

அவரது தந்தை எச்.டி.ரேவண்ணா வீட்டில், பாதிக்கப்பட்ட பெண்ணை அழைத்து வந்து சிறப்புப் புலனாய்வுக் குழு விசாரணை நடத்தி வருகிறது.