கல்லூரி மாணவிக்கு பாலியல் தொல்லை

காரைக்கால்

கல்லூரி மாணவிக்கு பாலியல் தொல்லை கொடுத்த ஓட்டல் ஊழியர் போக்சோ சட்டத்தின்கீழ் கைது செய்யப்பட்டார்.

கல்லூரி மாணவி

புதுவை மாநிலம் காரைக்காலை அடுத்த கோட்டுச்சேரி பகுதியைச் சேர்ந்த 18 வயது மாணவி ஒருவர், காரைக்காலில் உள்ள ஒரு தனியார் கல்லூரியில் படித்து வருகிறார்.

கோட்டுச்சேரியை சேர்ந்தவர் பால் எடிசன் (வயது33). இவர், அப்பகுதியில் உள்ள ஓட்டல் ஒன்றில் ஊழியராக வேலை செய்து வருகிறார். மாணவி கல்லூரிக்கு சாலையில் நடந்து செல்லும்போது, அக்கறையோடு பால் எடிசன் விசாரித்து வந்துள்ளார்.

இந்தநிலையில் நேற்று வழக்கம் போல் சென்ற மாணவியை தனது வீட்டின் கொல்லைப்புறம் வழியாக வலுக்கட்டாயமாக இழுத்துச் சென்று பாலியல் தொல்லை கொடுத்ததாக கூறப்படுகிறது.

போக்சோவில் கைது

அவரது பிடியில் இருந்து திமிறிய மாணவி அங்கிருந்து தப்பி ஓட்டம் பிடித்தாா். அப்போது, இது குறித்து யாரிடமாவது சொன்னால், உன்னையும், உன் குடும்பத்தையும் கொலை செய்துவிடுவேன் என பால் எடிசன் மிரட்டியதாக தெரிகிறது.

இது குறித்து மாணவி தனது தாயாரிடம் சொல்லி அழுதுள்ளார். இதையடுத்து கோட்டுச்சேரி போலீஸ் நிலையத்தில் மாணவி தரப்பில் புகார் கொடுத்தனர். அதன்பேரில், போலீசார் பால் எடிசன் மீது போக்சோ மற்றும் கொலை மிரட்டல் ஆகிய பிரிவுகளின்கீழ் வழக்குப்பதிவு செய்து அவரை கைது செய்தனர்.