காஷ்மீரில் ராணுவ அதிகாரி வீர மரணம்; 3 வீரர்கள் காயம்

காஷ்மீர்,

காஷ்மீரின் கிஸ்த்வர் மாவட்டத்தில் கிராம பாதுகாவலர்கள் நசீர் அகமது, குல்தீப் குமார் ஆகியோரை பயங்கரவாதிகள் குந்த்வாரா மற்றும் கேஷ்வான் வனப்பகுதிக்கு கடந்த வியாழக்கிழமை கடத்திச் சென்று சுட்டுக் கொன்றனர். அவர்களை தேடும் பணியில் ராணுவத்தினர் மற்றும் போலீசார் கடந்த சில நாட்களாக ஈடுபட்டு வந்தனர்.

இந்நிலையில், குந்த்வாரா மற்றும் கேஷ்வான் வனப்பகுதியில் பார்த் ரிட்ஜ் என்ற இடத்தில், கிராம பாதுகாவலர்களை சுட்டுக் கொன்ற 4 பயங்கரவாதிகளின் நடமாட்டம் இருப்பதகாக தகவல் கிடைத்தது. தகவல் கிடைத்தனின் பேரில் அந்த இடத்தை ராணுவத்தினரும், காஷ்மீர் போலீசாரும் இன்று காலை 11 மணியளவில் சுற்றி வளைத்தனர்.

அப்போது இரு தரப்பினர் இடையே கடும் துப்பாக்கி சண்டை நடந்தது. இதில் ராணுவத்தின் 16-வது படைப்பிரிவைச் சேர்ந்த ஜுனியர் அதிகாரி (ஜேசிஓ) நாயப் சுபேதார் ராகேஷ் குமார் வீர மரணம் அடைந்தார். மேலும் 3 வீரர்கள் காயம் அடைந்தனர். பயங்கரவாதிகளுடன் தொடர்ந்து சண்டை நடந்து வருகிறது.