'சொர்க்கவாசல்' படத்திற்கு வரவேற்பு - நன்றி தெரிவித்து வீடியோ வெளியிட்ட ஆர்.ஜே.பாலாஜி

சென்னை,

'நானும் ரவுடிதான், எல்.கே.ஜி, மூக்குத்தி அம்மன், ரன் பேபி ரன், புகழ்' போன்ற படங்களில் நடித்து பிரபலமடைந்தவர் நடிகர் ஆர்.ஜே.பாலாஜி. நயன்தாரா நடிப்பில் வெளிவந்த 'மூக்குத்தி அம்மன்' படத்தின் மூலம் இயக்குனனராக அறிமுகமானார். அவரே இயக்கி நடித்த 'சிங்கப்பூர் சலூன்' படம் வெளியாகி கலவையான விமர்சனங்களைப் பெற்றது. தற்போது நடிகர் சூர்யாவின் 45-வது படத்தை இயக்குகிறார்.

இவர் தற்போது பா. ரஞ்சித்தின் உதவி இயக்குநர் சித்தார்த் விஸ்வநாத் இயக்கத்தில் 'சொர்க்கவாசல்' என்ற படத்தில் நடித்து முடித்துள்ளார். ஸ்வீப் ரைட் ஸ்டூடியோஸ் தயாரித்துள்ள இந்தப் படத்தின் கதையை இயக்குனர் உடன் தமிழ்ப் பிரபா, அஸ்வின் ரவிச்சந்திரன் இணைந்து எழுதியுள்ளார்கள். மத்திய சிறைச்சாலையை மையமாக வைத்து 1999-ல் நடக்கும் கதையாக இப்படம் உருவாகியுள்ளது. இதில், செல்வராகவன், கருணாஸ், பாலாஜி சக்திவேல், எழுத்தாளர் சோஷா சக்தி உள்ளிட்டோர் நடித்துள்ளனர்.

இப்படம் நேற்றுமுன்தினம் வெளியானது. இந்த படத்தின் முதல் பாதி உணர்வுப்பூர்வமாக நகர்ந்த நிலையில் இரண்டாம் பாதியில் ரத்தம் தெளிக்கும் வன்முறை காட்சிகள் இடம்பெற்று இருந்தது. இப்படம் ரசிகர்கள் மத்தியில் நல்ல வரவேற்பை பெற்றுவருகிறது. இந்த படம் முதல் நாளில் இந்தியா முழுவதும் ஒரு கோடி ரூபாய் வசூல் செய்திருப்பதாக தகவல்கள் தெரிவிக்கின்றன. இனிவரும் நாட்களிலும் படத்தின் வசூல் அதிகரிக்கும் என்று எதிர்பார்க்கப்படுகிறது.

இந்த நிலையில் படத்திற்கு கிடைத்த வரவேற்பு குறித்து ஆர்.ஜே.பாலாஜி நன்றி தெரிவித்து வீடியோ வெளியிட்டுள்ளார். அந்த வீடியோவில் சொர்க்காசல் படத்தில் எழுத்தாளர்களில் ஒருவரான அஸ்வின் ரவிச்சந்திரனும் உடனிருந்தார். அதில் ஆர்.ஜே.பாலாஜி பேசுகையில், "நானும் அஷ்வினும் வேறொரு படத்தின் ஷூட்டிங்கில் இருக்கிறோம். அதனால் தியேட்டர் தியேட்டராக சென்று சொர்க்கவாசல் படத்தை புரொமோட் செய்ய முடியவில்லை. ஆனால் நீங்க படம் பிடிச்சிருப்பதாக சொல்லும் போது ரொம்ப சந்தோஷம். என்னை விட அஷ்வினுக்கு ரொம்ப சந்தோஷம். ஏனென்றால் அவருடைய முதல் படம் இதுதான்.

அதேபோல் என்னுடைய நடிப்புக்கு நல்ல ரெஸ்பான்ஸ் கிடைச்சிருக்கு. ரொம்ப நெகிழ்ச்சியா இருக்கு. அது என்னுடைய நம்பிக்கையை பூஸ்ட் பண்ணியிருக்கு. புயல் இருந்தாலும் மற்ற மாவட்டங்களில் நல்ல ரெஸ்பான்ஸ் இருப்பதாக எங்க பட டிஸ்ட்ரிபியூட்டர் சொன்னார். எனக்காக இல்லைனாலும் அஷ்வினுக்காக எல்லாரும் பாருங்க. நல்ல படத்தை எப்போதுமே நீங்க வாழ வைப்பீங்கன்னு மறுபடியும் ஒரு தடவை நிரூபிச்சிருக்கீங்க" என்றார்.

ஆர்.ஜே. பாலாஜி தற்போது சூர்யாவை வைத்து ஒரு படம் இயக்கி வருகிறார். படப்பிடிப்பு கோவையில் நடந்து வருவது குறிப்பிடத்தக்கது.