உலக டேபிள் டென்னிஸ் தரவரிசை: 24-வது இடத்துக்கு முன்னேறினார் இந்திய வீராங்கனை மணிகா பத்ரா

புதுடெல்லி,

உலக டேபிள் டென்னிஸ் வீரர், வீராங்கனைகளின் புதிய தரவரிசை பட்டியலை சர்வதேச டேபிள் டென்னிஸ் சம்மேளனம் நேற்று வெளியிட்டது. அதன்படி பெண்கள் ஒற்றையர் தரவரிசையில் இந்திய முன்னணி வீராங்கனை மணிகா பத்ரா 15 இடங்கள் ஏற்றம் கண்டு 24-வது இடத்தை பிடித்துள்ளார்.

28 வயது மணிகா பத்ரா கடந்த வாரம் நடந்த சவுதி ஸ்மாஷ் போட்டியில் முன்னாள் உலக சாம்பியனும், உலக தரவரிசையில் 2-வது இடத்தில் இருந்தவருமான வாங் மான்யுவை (சீனா) வீழ்த்தியதுடன் கால்இறுதிக்கு முன்னேறி அசத்தினார். இந்த சிறப்பான செயல்பாட்டின் மூலம் அவர் முன்னேற்றம் கண்டுள்ளார்.

உலக தரவரிசையில் டாப்-25 இடங்களுக்கு வந்த முதல் இந்திய வீராங்கனை என்ற பெருமையை சொந்தமாக்கினார். இது மணிகா பத்ராவின் சிறந்த தரநிலையாகும். அத்துடன் சக வீராங்கனை ஸ்ரீஜா அகுலாவை (41-வது இடம்) பின்னுக்கு தள்ளி மீண்டும் இந்தியாவின் 'நம்பர் ஒன்' இடத்தை தனதாக்கினார்.

இதற்கு முன்பு 2019-ம் ஆண்டு இந்திய வீரர்களில் சத்யன் மட்டும் டாப்-25 இடத்தை பிடித்து இருந்தார். 'டாப்-25 இடத்துக்கு முன்னேறி சாதித்து இருப்பது தனது நம்பிக்கையை நிச்சயம் அதிகரிக்கும். பயிற்சியாளர் உள்பட தனக்கு ஆதரவு அளிக்கும் அனைவருக்கும் நன்றி' என்று மணிகா பத்ரா தனது சமூக வலைதள பதிவில் தெரிவித்துள்ளார்.

ஆண்கள் ஒற்றையர் தரவரிசையில் இந்திய வீரர் சரத் கமல் 3 இடம் சரிந்து 40-வது இடம் பெற்றுள்ளார். இந்திய வீரர்கள் மானவ் தாக்கர் 2 இடம் சறுக்கி 62-வது இடமும், ஹர்மீத் தேசாய் ஒரு இடம் உயர்ந்து 63-வது இடமும் பெற்றுள்ளனர்.

பெண்கள் இரட்டையர் பிரிவில் இந்தியாவின் சுதிர்தா முகர்ஜி-அஹிகா முகர்ஜி இணை ஒரு இடம் முன்னேறி 13-வது இடம் பிடித்துள்ளது. ஆண்கள் இரட்டையர் பிரிவில் மானவ் தாக்கர்-மனுஷ் ஷா ஜோடி 3 இடம் சரிந்து 15-வது இடம் பெற்றுள்ளது. கலப்பு இரட்டையர் பிரிவில் மணிகா பத்ரா-சத்யன் கூட்டணி ஒரு இடம் பின்தங்கி 24-வது இடம் வகிக்கிறது.