இண்டியன்வெல்ஸ் டென்னிஸ்: இறுதிப்போட்டியில் ஸ்வியாடெக் - மரியா சக்காரி மோதல்

இண்டியன்வெல்ஸ்,

முன்னணி வீரர், வீராங்கனைகள் பங்கேற்றுள்ள இண்டியன்வெல்ஸ் ஓபன் சர்வதேச டென்னிஸ் போட்டி அமெரிக்காவில் நடந்து வருகிறது.

இதில் பெண்கள் ஒற்றையர் பிரிவில் நேற்று நடந்த அரைஇறுதி ஆட்டம் ஒன்றில் 4 கிராண்ட்ஸ்லாம் பட்டம் வென்றவரும், 'நம்பர் ஒன்' வீராங்கனையுமான இகா ஸ்வியாடெக் (போலந்து), உலக தரவரிசையில் 32-வது இடத்தில் இருக்கும் மார்த்தா கோஸ்ட்யூக்கை 6-2, 6-1 என்ற நேர்செட்டில் ஊதித்தள்ளி 2-வது முறையாக இறுதிப்போட்டிக்கு முன்னேறினார். ஸ்வியாடெக் இந்த போட்டி தொடரில் ஒரு செட்டை கூட இழக்காமல் இறுதிப்போட்டிக்குள் அடியெடுத்து வைத்து இருக்கிறார்.

மற்றொரு அரைஇறுதியில் உலக தரவரிசையில் 9-வது இடம் வகிக்கும் கிரீஸ் வீராங்கனை மரியா சக்காரி, அமெரிக்க ஓபன் சாம்பியனும், 3-ம் நிலை வீராங்கனையுமான அமெரிக்காவின் கோகோ காப்பை 6-4, 6-7 (5-7), 6-2 என்ற செட் கணக்கில் வீழ்த்தி இறுதிப்போட்டிக்கு தகுதி பெற்றார்.

பெண்கள் ஒற்றையர் இறுதிப்போட்டியில் மரியா சக்காரி, 'நம்பர் ஒன்' வீராங்கனை இகா ஸ்வியாடெக்குடன் பலப்பரீட்சை நடத்துகிறார். இண்டியன்வெல்ஸ் தொடரில் 2022-ம் ஆண்டு இறுதி ஆட்டத்தில் இருவரும் மோதியதில் ஸ்வியாடெக் வென்று சாம்பியன் பட்டத்தை கைப்பற்றி இருந்தார். இதுவரை இருவரும் 5 முறை நேருக்கு நேர் மோதியதில் சக்காரி 3 ஆட்டங்களில் வென்று முன்னிலை வகிக்கிறார். கடைசி 2 மோதலில் ஸ்வியாடெக் நேர்செட்டில் வென்றுள்ளார் என்பது குறிப்பிடத்தக்கது.