டி20 உலகக்கோப்பை: இந்தியாவுடன் இறுதிப்போட்டியில் மோதப்போகும் அணி இதுதான் - லாரா கணிப்பு

ஐதராபாத்,

20 அணிகள் கலந்துகொள்ள உள்ள 9-வது உலகக்கோப்பை தொடர் அடுத்த மாதம் அமெரிக்கா மற்றும் வெஸ்ட் இண்டீசில் நடைபெற உள்ளது. இதில் இந்திய அணி 'ஏ' பிரிவில் பாகிஸ்தான், அயர்லாந்து, கனடா, அமெரிக்கா ஆகிய அணிகளுடன் இடம்பெற்றுள்ளது. இந்தியா தனது தொடக்க ஆட்டத்தில் வரும் ஜூன் 5-ந்தேதி அயர்லாந்துடன் நியூயார்க் நகரில் மோதுகிறது.

இந்த தொடருக்கான 15 பேர் கொண்ட இந்திய அணி கடந்த சில தினங்களுக்கு முன் அறிவிக்கப்பட்டது. கேப்டனாக ரோகித் சர்மா நீடிக்கும் நிலையில், துணை கேப்டன் பொறுப்பு ஆல்-ரவுண்டர் ஹர்திக் பாண்ட்யாவிற்கு வழங்கப்பட்டுள்ளது. அந்த அணியில் விராட் கோலி, சூர்யகுமார் யாதவ் ஆகியோர் தேர்வு செய்யப்பட்டுள்ளனர். அதேபோல விக்கெட் கீப்பர்களாக நல்ல பார்மில் உள்ள ரிஷப் பண்ட் மற்றும் சஞ்சு சாம்சன் ஆகியோர் தேர்வாகியுள்ளது ரசிகர்களிடம் வரவேற்பை பெற்றுள்ளது.

ஆனால் இந்த அணியில் நடப்பு ஐ.பி.எல். சீசனில் அசத்தி வரும் நடராஜன், கெய்க்வாட், ரியான் பராக் ஆகிய வீரர்களை தேர்வுக்குழு கழற்றி விட்டது ரசிகர்களுக்கு ஏமாற்றத்தை கொடுத்துள்ளது. அதனால் இம்முறையும் கோப்பையை வெல்வது கடினம் என்று பல இந்திய ரசிகர்களே சமூக வலைதளங்களில் அதிருப்தியை வெளிப்படுத்தி வருகின்றனர்.

இந்நிலையில் கடைசியாக தங்கள் ஊரில் 2007-ல் நடைபெற்ற ஒருநாள் உலகக்கோப்பையில் இந்தியா லீக் சுற்றுடன் வெளியேறியது ஏமாற்றத்தை கொடுத்ததாக பிரையன் லாரா தெரிவித்துள்ளார். எனவே இம்முறை சிறப்பாக விளையாடி இந்தியா இறுதிப்போட்டிக்கு தகுதி பெறும் என்று நம்புவதாகவும் லாரா கூறியுள்ளார். அதேபோல 2 டி20 உலகக்கோப்பைகளை வென்ற வெஸ்ட் இண்டீஸ் இம்முறை தங்களுடைய சொந்த மண்ணில் சிறப்பாக விளையாடிய இந்தியாவுடன் பைனலில் மோதும் என்றும் பிரையன் லாரா கணித்துள்ளார்.

இது பற்றி அவர் பேசியது பின்வருமாறு:- "வெஸ்ட் இண்டீஸ் அணி சிறப்பாக செயல்படும். அவர்களிடம் நிறைய நட்சத்திர வீரர்கள் உள்ளனர். வெற்றிக்கு அவர்கள் அனைவரும் இணைந்து ஒன்றாக செயல்பட வேண்டும். இந்திய அணியின் தேர்வு சில சர்ச்சைகளை கண்டு வருகிறது. இருப்பினும் அவர்கள் டாப் 4 அணிகளில் ஒன்றாக இருப்பார்கள். கடற்கரைகளைக் கொண்ட வெஸ்ட் இண்டீஸை இங்கிலாந்து அணியினர் எப்போதும் விரும்புவார்கள். எனவே இங்கிலாந்து டாப் 4 அணிகளில் ஒன்றாக இருக்கும்.

ஆப்கானிஸ்தான் அணியும் அங்கே வருவதற்கான திறமையை கொண்டுள்ளது. இந்தியா மற்றும் வெஸ்ட் இண்டீஸ் இறுதிப்போட்டிக்கு வரலாம். 2007-ல் நடைபெற்ற ஒருநாள் உலகக்கோப்பையில் இந்தியா 2-வது சுற்றுடன் வெளியேறியது கரீபியன் ரசிகர்களுக்கு ஏமாற்றமாக அமைந்தது. அதை நாங்கள் மீண்டும் பார்க்க விரும்பவில்லை. எனவே இந்தியா மற்றும் வெஸ்ட் இண்டீஸ் இறுதிப்போட்டியில் மோதும். அதில் சிறந்த அணி வெல்லும்" என்று கூறினார்.