ஐசிசி டி20 பேட்டிங் தரவரிசை: முதல் இடத்தை நெருங்கும் சூர்யகுமார் யாதவ்..!!
இந்திய வீரர்களில் சூர்யகுமார் யாதவை தவிர வேற எந்த இந்திய வீரரும் முதல் 10 இடங்களுக்குள் இல்லை.
Image Courtesy: Twitter @BCCI
துபாய்,
ஆண்களுக்கான டி20 பேட்டிங் தரவரிசையை ஐசிசி நேற்று வெளியிட்டுள்ளது. இதில் இந்திய வீரர் சூர்யகுமார் யாதவ் 838 ரேட்டிங் புள்ளிகளுடன் 2-வது இடத்தில் நீடிக்கிறார். தென் ஆப்பிரிக்க அணிக்கு எதிராக சமீபத்தில் நடந்து முடிந்த 2-வது டி20 போட்டியில் சூர்யகுமார் யாதவ் சிறப்பான ஆட்டத்தை வெளிப்படுத்தி இருந்தார்.
இருப்பினும் நேற்று முன்தினம் நடந்த 3-வது டி20 போட்டியில் சோபிக்க தவறியதால் அவர் முதல் இடத்தை நூலிழையில் தவறவிட்டுள்ளார். இந்த தரவரிசையில் முகமது ரிஸ்வான் 854 புள்ளிகள் உடன் முதல் இடத்தில் இருக்கிறார். ரிஸ்வான்- சூர்யகுமார் ஆகியோருக்கு இடையே 16 புள்ளிகள் மட்டுமே வித்தியாசம் உள்ளது. 3-வது இடத்தில் பாகிஸ்தான் அணியின் கேப்டன் பாபர் அசாம் (801 ரேட்டிங் புள்ளி) உள்ளார்.
இந்திய வீரர்களில் சூர்யகுமார் யாதவை தவிர வேற எந்த இந்திய வீரரும் முதல் 10 இடங்களுக்குள் இல்லை. கே எல் ராகுல் 14-வது இடத்திலும், விராட் கோலி 15 வது இடத்திலும், ரோகித் சர்மா 16 வது இடத்திலும் உள்ளனர். இதேபோன்று தென் ஆப்பிரிக்காவின் குயின்டன் டி காக் 8 இடங்கள் முன்னேறி 12-வது இடத்திலும், சதம் விளாசிய ரூசோவ் 23 இடங்கள் முன்னேறி 20 இடத்திலும், அதிரடி வீரர் டேவிட் மில்லர் 10 இடங்கள் முன்னேறி 29-வது இடத்திலும் உள்ளனர்.