சாராயம் கடத்திய வாலிபர் கைது

நாகூர்:

நாகை மாவட்ட போலீஸ் சூப்பிரண்டு ஜவகர் உத்தரவின் பேரில் பல்வேறு இடங்களில் சாராய கடத்தலை தடுக்கும் வகையில் போலீசார் வாகன சோதனையில் ஈடுபட்டு வருகின்றனர். அதன்படி நாகூர் - திட்டச்சேரி சாலையில் நாகூர் போலீசார் நேற்று முன்தினம் இரவு வாகன சோதனையில் ஈடுபட்டனர். அப்போது அந்த வழியாக மோட்டார் சைக்கிளில் வேகமாக வந்த நபரை நிறுத்தி சோதனை செய்தனர். இதில் அவர் சாராயம் கடத்தி வந்தது தெரிய வந்தது. பின்னர் மோட்டார் சைக்கிளில் வந்த நபரிடம் போலீசார் விசாரணை நடத்தினர். இதில் அவர், நாகூர் பிரோடும் தெரு அம்பேத்கர் நகரை சேர்ந்த முருகன் மகன் விஸ்வா (வயது20) என்பது தெரிய வந்தது. இது குறித்து நாகூர் போலீசார் வழக்குப்பதிவு செய்து விஸ்வாவை கைது செய்தனர். மேலும் அவரிடம் இருந்து 110 லிட்டர் சாராயத்தையும், கடத்தலுக்கு பயன்படுத்திய மோட்டார் சைக்கிளையும் பறிமுதல் செய்தனர்.