ரகளையில் ஈடுபட்ட வாலிபர் கைது

ஒரத்தநாடு;

ஒரத்தநாட்டை அடுத்துள்ள கருக்காடிப்பட்டி பிரிவு சாலை பஸ் நிழற்குடை கட்டிடம் அருகே நேற்று முன்தினம் நள்ளிரவில் வாலிபர்கள் சிலர் போதையில் ரகளையில் ஈடுபடுவதாக போலீசாருக்கு தகவல் கிடைத்தது. இதைத்தொடர்ந்து சம்பவ இடத்துக்கு ஒரத்தநாடு போலீஸ் இன்ஸ்பெக்டர் அன்பழகன் தலைமையிலான போலீசார் விரைந்து சென்றனர். போலீசார் வருவதைக் கண்டதும் வாலிபர்கள் அங்கிருந்து தப்பி ஓடினர்.

அப்போது சிக்கிய ஒரு வாலிபரை பிடித்து போலீசார் விசாரணை நடத்தினர். விசாரணையின் போது அந்த வாலிபரிடம் இருந்து 40 கிராம் கஞ்சாவை போலீசார் கைப்பற்றினர். போலீசார் அவரிடம் நடத்திய விசாரணையில் அந்த வாலிபர் ஒரத்தநாடு பகுதியை சேர்ந்த சரவணக்குமார் (வயது21) என்றும், இவர் பட்டதாரி என்பதும் தெரியவந்தது. இதைத்தொடர்ந்து ஒரத்தநாடு போலீசார் சரவணகுமாரை கைது செய்தனர்.

மேலும் போலீசாரை கண்டதும் தப்பி ஓடிய திருச்சி கல்லூரியில் படிக்கும் மாணவர் தான் கஞ்சா போதை பொருளை வெளியூரிலிருந்து கொண்டு வந்தவர் என்பது விசாரணையில் தெரிய வந்துள்ளது. இதனால் அந்த மாணவரையும், மற்றொரு வாலிபரையும் போலீசார் தேடி வருகின்றனர்.