மரத்தில் மோட்டார் சைக்கிள் மோதி தொழிலாளி பலி

கூலித்தொழிலாளி

வாணியம்பாடி அருகே உள்ள பூங்குளத்தை அடுத்த பலப்பல்நத்தம் கிராமம் பூஜாரி வட்டம் பகுதியைச் சேர்ந்தவர் குமரேசன் (வயது 47), கூலித் தொழிலாளி. நேற்று முன்தினம் மாலை இவர் ஆலங்காயத்தில் வேலையை முடித்துவிட்டு, மோட்டார் சைக்கிளில் திரும்பிக்கொண்டிருந்தார்.

நரசிங்கபுரம் அருகே சென்றபோது திடீரென மோட்டார் சைக்கிள் நிலைதடுமாறி சாலை ஓரத்தில் உள்ள புளிய மரத்தில் வேகமாக மோதியது. இந்த விபத்தில் குமரேசன் பலத்த காயமடைந்தார். அந்த பகுதியில் இருந்தவர்கள் அவரை மீட்டு சிகிச்சைக்காக வாணியம்பாடி அரசு மருத்துவமனைக்கு அனுப்பி வைத்தனர். அங்கு டாக்டர்கள் பரிசோதனை செய்தபோது குமரேசன் ஏற்கனவே இறந்துவிட்டதாக தெரிவித்தனர்.

இது குறித்து ஆலங்காயம் போலீசார் வழக்குப்பதிவு செய்து விசாரணை நடத்தி வருகின்றனர்.

டிராக்டர் கவிழ்ந்தது

இதேபோல் பூங்குளம் காளி வட்டத்தைச் சேர்ந்தவர் நவீன் குமார் (30) இவர் டிராக்டர் வைத்து விவசாயம் செய்து வருகிறார். இந்த நிலையில் தனது வீட்டிலிருந்த டிராக்டரை விவசாய வேலைக்காக நிலத்திற்கு ஓட்டிக் கொண்டு பூங்குளம் நோக்கி சென்றார்.

பூங்குளம் ரைஸ்மில் அருகே சென்றபோது டிராக்டர் நிலைதடுமாறி சாலையின் நடுவில் கவிழ்ந்து விபத்துக்குள்ளானது. இதில் டிராக்டரை ஓட்டி வந்த நவீன்குமார் பலத்த காயமடைந்தார்.

அங்கு இருந்தவர்கள் அவரை மீட்டு வாணியம்பாடி அரசு மருத்துவமனைக்கு அனுப்பி வைத்தனர். அவருக்கு தீவிர சிகிச்சை அளிக்கப்பட்டு வருகிறது.

இது குறித்து ஆலங்காயம் போலீசார் வழக்குப்பதிவு செய்து விசாரணை நடத்தி வருகின்றனர்.