எல்லீஸ்நகர் சாலையில் குடிநீர் கேட்டு பெண்கள் மறியல்

மதுரை மத்திய தொகுதிக்கு உட்பட்ட 59-வது வார்டு மகபூப்பாளையம் பூக்காரதோப்பு பகுதியில் 300-க்கும் மேற்பட்ட குடும்பத்தினர் வசித்து வருகின்றனர். இந்த பகுதியில் கடந்த சில மாதங்களாக குடிநீர் வினியோகம் இல்லை. எனவே அந்த பகுதியை சேர்ந்த மக்கள் தண்ணீரை விலைக்கு வாங்கி பயன்படுத்தும் நிலை ஏற்பட்டது. இது குறித்து பல முறை மாநகராட்சி அலுவலகம் மற்றும் கவுன்சிலர், அமைச்சர் அலுவலகம் என பல இடங்களில் புகார் அளித்தனர். ஆனால் இதுவரை எவ்வித நடவடிக்கையும் எடுக்கவில்லை எனக்கூறப்படுகிறது. இந்த நிலையில் சீரான குடிநீர் வினியோகம் செய்யக்கோரி அந்த பகுதியை சேர்ந்த பெண்கள் மற்றும் பள்ளி மாணவர்கள் என பலர் எல்லீஸ்நகர் சாலையில் அமர்ந்து மறியல் போராட்டத்தில் ஈடுபட்டனர். இது குறித்த தகவல் அறிந்த எஸ்.எஸ்.காலனி போலீசார் சம்பவ இடத்திற்கு விரைந்து சென்றனர். பின்னர் அவர்கள் மறியலில் ஈடுபட்டவர்களிடம் பேச்சுவார்த்தை நடத்தி அவர்களை அங்கிருந்து கலைந்து போக செய்தனர். இந்த சம்பவத்தால் அந்த பகுதியில் போக்குவரத்து நெரிசல் ஏற்பட்டது.